SQO-da 25 gektar jerdegi qurǵaq shóp órtendi
ASTANA. KAZINFORM — SQO-da qutqarýshylar túnde qurǵaq ósimdikterdiń janýyn sóndirdi, dep habarlaıdy TJM baspasóz qyzmeti.
Soltústik Qazaqstan oblysynyń Qyzyljar aýdanynda, Kishi Beloe aýylynyń mańynda 25 gektar aýmaqta qurǵaq shóp jandy.
Órtti sóndirý jumystary táýliktiń qarańǵy ýaqytyna, ekpindi jelge jáne órttiń jekelegen ýchaskelerine kirme joldardyń bolmaýyna baılanysty qıyndady.
Sonymen qatar órttiń orman alqabyna taralý qaýpi boldy. Ol jerde aldyn ala málimet boıynsha aýmaǵy 0,9 gektardy quraıtyn tómengi qabattaǵy orman órti tirkelgen.
Vedomstvo málimetinshe, kúrdeli jaǵdaıǵa qaramastan, qutqarýshylar jaǵdaıdy baqylaýǵa alyp, órttiń odan ári orman qoryna taralýyna jol bermedi.
— Órtti sóndirýge TJD, orman sharýashylyǵynyń jáne jergilikti atqarýshy organdardyń kúshteri men quraldary jumyldyryldy. Barlyǵy 154 adam men 58 tehnıka tartyldy. Jumys barysynda órt oshaǵynyń búkil perımetri boıynsha aýmaq jyrtylyp, mıneraldandyrylǵan jolaqtar jasaldy. Zardap shekkender joq, — delingen habarlamada.
Budan buryn Petropavl mańynda 6 gektar aýmaqtaǵy órt tolyq oqshaýlanǵanyn jazǵanbyz.
