SQO-da 233 eldi meken taza aýyz sýmen qamtamasyz etilmegen
PETROPAVL. QazAqparat – Soltústik Qazaqstan oblysynda eldi mekenderdegi taza aýyz sý máselesin sheshýge bıyl 11,4 mlrd teńge bólindi. Bul ótken jylmen salystyrǵanda 1,8 ese artyq qarajat, dep habarlaıdy QazAqparat tilshisi.
Óńirlik kommýnıkatsııalar qyzmetinde SQO energetıka jáne turǵyn úı-kommýnaldyq sharýashylyǵy basqarmasynyń basshysy Baqyt Іlııasov oblystaǵy eldi mekenderdi sýmen qamtý máselesine toqtaldy. Onyń aıtýynsha, 248,2 myń adam nemese aýyl halqynyń 82,9 %-y, ıaǵnı 402 eldi meken ortalyqtandyrylǵan aýyz sýmen qamtylǵan. Taǵy 51,3 myń adamnyń nemese 233 eldi mekende taza sý máselesi sheshilmegen. Jalpy oblys halqynyń 90,7 %-yna sapaly sý jetken.
«Bıyl sýmen jabdyqtaýǵa 11,4 mlrd teńge bólinbek, bul ótken jylǵa qaraǵanda 1,8 ese joǵary. Jumystar 48 myń turǵyny bar 49 eldi mekende júrgiziledi. Nátıjesinde 174 km sýmen jabdyqtaý jelileri qalpyna keltiriledi, bul shamamen 3 myń úıdiń sýǵa qosylýyna múmkindik beredi. «2020-2025 jyldarǵa arnalǵan «Nurly jer» memlekettik baǵdarlamasy aıasynda sýmen jabdyqtaý nysandaryn salý jáne qaıta qurý boıynsha 13 jobany jáne Indýstrııa jáne ınfraqurylymdyq damý mınıstrligi arqyly sý burý boıynsha
2 jobany iske asyrýǵa 5,5 mlrd teńge jumsalmaq. Osy jobalardy júzege asyrý arqyly 46,2 km taratýshy jáne 4,1 km sý burý jelilerin aýystyrý josparlanǵan», - deıdi Baqyt Іlııasov.
Budan basqa «Jumyspen qamtýdyń 2020-2021 jyldarǵa arnalǵan Jol kartasy» baǵdarlamasy aıasynda 1,8 mlrd teńgege 4 joba qolǵa alynǵan. Nátıjesine 53,7 km sýmen jabdyqtaý jelilerin salý, sondaı-aq 30-ǵa jýyq jumys ornyn qurý josparlanǵan. Onyń 33,3 km salyndy, ýaqytsha 16 jumys orny quryldy.
«Aýyl-El besigi» memlekettik baǵdarlamasy aıasynda Beskól aýylynyń ońtústik-shyǵys bóligin úzdiksiz sýmen jabdyqtaý úshin rezervýarlar men sorǵy stantsııasyn iske qosý josparlanǵan.
«Qazirgi ýaqytta halyq úshin 1 tekshe metr aýyz sý úshin tólem 2006 jyldan beri ózgerissiz keledi, alaıda, osy ýaqyt aralyǵynda sýmen jabdyqtaý qyzmetterine tarıfter kezeń-kezeńimen joǵarylaǵanyn atap ótken jón. Bekitilgen tarıf pen kórsetilgen sýmen jabdyqtaý qyzmetteri úshin tólem arasyndaǵy aıyrmashylyq memleket esebinen ótelip keledi. Halyq 1 tekshe metr úshin 30-40 teńge shamasynda tóleıdi. Jańa tólemaqy mólsherin bekitý shamamen 225 myń turǵyny bar oblystyń 267 aýyldyq eldi mekenin qamtıdy», - deıdi basqarma basshysy.
Buǵan deıin ashyq normatıvtik-quqyqtyq aktiler portalynda jańa jyldan bastap sýdyń baǵasy eki ese qymbattaıtyndyǵy týraly jazylyp, usynystar men talqylaýlar úshin ornalastyrylǵan edi.
