SQO-da 23 jastaǵy jigit kúıikten qaza boldy
PETROPAVL. QazAqparat – Soltústik Qazaqstan oblysynda polıtseıler túsiniksiz jaǵdaıda kúıik alǵan 23 jastaǵy jigittiń ólimine qatysty tergeýdi bastady, dep habarlaıdy QazAqparat tilshisi polisia.kz saıtyna silteme jasap.
Oqıǵa 19 qarasha kúni SQO-daǵy Beskól aýylynda bolǵan. Petropavldyń 23 jastaǵy turǵyny tórt dosymen jeke turǵyn úılerdiń birinde saýyq qurǵan.
Joldastarynyń aıtýynsha, sol kúni tańerteń ol ot jaǵatyn úıge temeki shegýge shyǵady. Biraz ýaqyttan keıin ol jerden janǵan kúıi atyp shyqqan. Dostary ony sóndirip alyp, birden jedel járdem qyzmetin shaqyrǵan. Al ot jaǵatyn úıden eritkish zaty bar janyp jatqan kanıstrdi tapqan.
Zardap shekken jigit aýdandyq ortalyq aýrýhanaǵa jetkizildi. Alaıda dárigerler onyń ómirine arasha túse almady. Ol sol kúni keshke jansaqtaý bóliminde kóz jumdy.
Bul derek Sotqa deıingi tergep-tekserýdiń biryńǵaı tizilimine «Óz-ózine qol jumsaýǵa ıtermeleý» baby boıynsha engizildi.
«Sot-medıtsınalyq jáne órt-tehnıkalyq saraptama taǵaıyndaldy. Іstiń mán-jaıyn anyqtaý maqsatynda sotqa deıingi tergeý júrgizilip jatyr», - deıdi Qyzyljar aýdandyq polıtsııa bóliminiń bastyǵy Álıhan Baıqadamov.
