SQO-da 23 mas júrgizýshi ustaldy
PETROPAVL. QazAqparat – Soltústik Qazaqstan oblysynda 12-15 qarasha aralyǵynda «Mas júrgizýshi» jedel-profılaktıkalyq is-sharasy ótip, nátıjesinde kólikti mas kúıde júrgizgen 23 júrgizýshi anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, «Mas júrgizýshi» jedel-profılaktıkalyq is-sharasy 4 kúnge josparlandy. Osy ýaqyt aralyǵynda oblys joldarynda 23 mas júrgizýshi ustaldy. Olardyń barlyǵy ákimshilik qamaýǵa alynyp, basym bóligi 7 jylǵa kólik quralyn basqarý quqyǵynan aıyryldy.
«Daewoo Nexia» avtokóliginiń júrgizýshisi Petropavldaǵy Ǵ. Músirepov kóshesi boıyndaǵy úılerdiń aýlasynda toqtatyldy. Er adamnan ishimdikti ıisi shyǵyp turǵan. Medıtsınalyq kýálandyrý tártip saqshylarynyń kúdigin rastady. Júrgizýshini tekserý kezinde onyń 2017 jyly mas kúıde rólge otyrǵany úshin kólik basqarý quqyǵynan aıyrylǵany anyqtaldy. Er adam tek 7 aı buryn ǵana avtokólikti júrgizý quqyǵyna qaıta ıe bolǵan eken. Jazalanǵanyna jyl tolmaýyna baılanysty endi ol aldaǵy 8 jylda kóligin tizgindeı almaıdy.
«Sondaı-aq, 4 kún ishinde patrýlder buryn basqarý quqyǵynan aıyryla tura mas kúıde qaıta rólge otyrǵan úsh júrgizýshini toqtatty. Zań ondaılarǵa 5 myń AEK deıingi aıyppul salý jáne ómir boıyna basqarý quqyǵynan aıyrý jazasyn qarastyrady. Qatań sharalardy qoldanbasqa bolmaıdy. SQO-da 10 aı ishinde túrli jol-kólik oqıǵalarynan 30 adam qaza tapty, onyń 5-i mas júrgizýshilerdiń kesirinen mert boldy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Atalmysh shara kezinde jol júrý qaǵıdasyn buzǵan 1 763 derek anyqtaldy. 179 adam basqarý quqyǵynsyz rólge otyrǵan, 119-y jyldamdyqty asyrǵan, 30-y baǵdarshamnyń ruqsat etilmegen túsine ótse, 19-y jaıaý júrginshi jolaǵynda adamdardy ótkizbegen.
