SQO-da 23 adam qyzylsha juqtyrdy, shamamen jartysy ekpe almaǵan
Soltústik Qazaqstan oblysynda qyzylshamen aýyrǵandar kóbeıdi. Qaýipti vırýsty juqtyrǵandardyń 59 % jeke senimge qatysty ekpe qoıylmaǵan, dep habarlaıdy Kazinform.
SQO Sanıtarııalyq-epıdemıologııalyq baqylaý departamentiniń málimetinshe, byltyr jyldyń osy kezeńinde qyzylshamen aýyrýdyń bir de bir deregi tirkelmese, bıyl 23 adam aýyrǵan. Olardyń tórteýi qazir statsıonarda, bireýi aýrýhanaǵa jatýdan bas tartyp, ambýlatorııalyq jaǵdaıda em alyp jatyr. 18 adam táýir boldy.
«Úsh adam qyzylshany BAÁ, Reseı jáne Qyrǵyzstannan juqtyryp kelgen. Aýyrǵandardyń 18-i – Petropavldan, ekeýi – M.Jumabaev, Aqqaıyń, Mamlıýt jáne Jambyl aýdandarynan bir adamnan.
Jastaryna keler bolsaq, 15 jaǵdaıda syrqattanǵandar kámelet jasyna deıingi balalar, sonyń toǵyzynda úıde otyrǵan bala aýyrǵan.
Juqtyrǵandardyń 59 % - jeke senimine qatysty qyzylshaǵa qarsy egilmegen, al bir bala vaktsınatsııa jasyna jetpegen. Bes jaǵdaıda syrqattardyń ekpe alý mártebesi belgisiz boldy», - deıdi SQO Sanıtarııalyq-epıdemıologııalyq baqylaý departamentiniń basshysy Áset Jumataev.
Qyzylsha – jedel vırýstyq ınfektsııa. Naýqas adamnan jótelý jáne túshkirý, jaqyn jeke baılanystar nemese juqtyrǵan muryn-jutqynshaq aǵyndylarymen tikeleı baılanys arqyly taralady.
«Qyzylsha vırýsy aýada nemese juqtyrǵan jerde 2 saǵat boıy belsendi jáne juqpaly bolyp qalady. Ol tek bir bólmede ǵana emes, sonymen qatar tómengi qabattan joǵarǵy qabatqa, dálizder men baspaldaqtar jáne jeldetý arqyly taralýy múmkin.
Vaktsınatsııalanbaǵan balalarda qyzylsha aýrýy jıi asqynyp, tipti ólimge de aparýy múmkin. Ekpe almaǵan júkti áıelderge de qaýip joǵary. Immýnıteti joq kez-kelgen adam – vaktsınatsııalanbaǵan nemese vaktsınatsııadan keıin ımmýnıtetti damytpaǵan adam qyzylshany juqtyrýy múmkin», - deıdi Áset Jumataev.
