SQO-da 23 adam qarý ustaý quqyǵynan aıyryldy
PETROPAVL. QazAqparat – Soltústik Qazaqstan oblysynda bıyl 23 adam qarý ustap, saqtaý quqyǵynan aıyryldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, qazirgi ýaqytta zańsyz ań aýlaý faktileri boıynsha birqatar sotqa deıingi tergep-tekserýler júrgizilýde. Kúdiktilerdiń ańdy atqany dáleldengen jaǵdaıda olar qylmystyq jaýapkershilikke tartylyp, azamattyq qarýdy jáne oq-dárilerdi paıdalanyp, saqtaý quqyǵynan aıyrylady.
Qarý paıdalanýǵa ruqsat merzimi úsh jylǵa nemese sottylyǵy ótelgenge deıin toqtatylady. Ol 9 qylmystyq árekette: uryp-soǵý, zańsyz ań aýlaý, esirtki zattaryn paıdalaný, kólik júrgizý quqyǵynan aıyrylǵan tulǵanyń mas kúıinde kólik tizginine otyrýy jáne taǵy basqa jaǵdaılarda qoldanylady. Otbasylyq janjalqoılarǵa da qarý ustaýǵa ruqsat joq. SQO-da jyl basynan 23 adam qarý saqtaý quqyǵynan aırylǵan, onyń 4-i otbasylyq janjalqoılar.
«Ákimshilik quqyq buzýshylyq jyl ishinde qaıta jasalǵan jaǵdaıda da qarýdy qoldaný ruqsaty joıylady. Oǵan kámeletke tolmaǵandarmen baılanysty jáne vandalızm, usaq buzaqylyq, qoǵamdyq oryndarda spırttik ishimdikter ishý, tynyshtyqty buzý sııaqty quqyq buzýshylyqtar kiredi. Qarýǵa ruqsat berý asqan jaýpkershilikti jáne qarý ıeleriniń zańnamalardy qatań saqtaýyn talap etedi», - deıdi SQO PD ákimshilik polıtsııa basqarmasynyń bastyǵy Serik Áljanov.
Ǵ. Músirepov atyndaǵy aýdannyń turǵyny qolynda tirkelgen qarýy bola tura, úıinde taǵy bir tirkelmegen qarý saqtaǵan, saldarynan ekeýinen de aıyryldy.
Jalpy SQO-da 10 aıdyń ishinde 7 myńnan astam qarý ıesi tekserildi. Qarýdy saqtaý jáne qaıta tirkeý erejelerin buzýdyń 848 deregi tirkeldi.
