SQO-da 2,2 myńnan astam abonent jaryqsyz otyr
PETROPAVL. KAZINFORM — Soltústik Qazaqstan oblysynda qatty jelden elektr symdaryna zaqym kelip, 2,5 myń abonent ótken táýlikte jaryqsyz qaldy.
SQO Tótenshe jaǵdaılar departamentiniń málimetinshe, qazirgi ýaqytta qalpyna keltirý jumysy júrgizilip jatyr.
— Daýyl saldarynan Aıyrtaý, Esil, Taıynsha jáne Ǵabıt Músirepov atyndaǵy aýdandarda 2555 abonent jaryqsyz qaldy. Túnde 345 abonentke elektr energııasy berildi. Qazirgi ýaqytta 2210 abonent jaryqsyz otyr, — deıdi SQO TJD tótenshe jaǵdaılardy joıý basqarmasynyń bastyǵy Dáýren Táýbaev.
«SEVKAZENERGO» kompanııasynyń málimetinshe, aýa raıynyń kúrt nasharlaýyna baılanysty Soltústik Qazaqstan elektrjelilik taratý kompanııasy mamandary kúsheıtilgen jumys rejımine aýystyryldy.
— Ótken táýlikte qolaısyz aýa raıyna baılanysty elektr berý jelilerinde 32 tehnologııalyq buzylý deregi tirkeldi. Mamandardyń jedel áreketiniń nátıjesinde qazirgi ýaqytta oblys aýdandarynda — 18, al Petropavlda 5-eýi qalpyna keltirildi.
Saldardy joıý jumystaryna 11 jóndeý brıgadasy men 19 arnaıy tehnıka jumyldyryldy, — delingen habarlamada.
Kompanııa ókilderiniń aıtýynsha, túk kórinbeıtin boran, qatty jel qyzmetkerlerdiń jumysyn qıyndatyp jatyr. Sondaı-aq Tótenshe jaǵdaılar departamentiniń joldardy jabýy da olarǵa qolbaılaý bolǵan.
Buǵan deıin «QazAvtoJol» ulttyq kompanııasy eldegi joldardyń qazirgi ahýaly týraly habarlaǵan edi.