SQO-da 22 myń ga ormandy alqapty jibek kóbelegi zaqymdaǵan

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, byltyr jaz mezgilinde ormanshylar óńirdiń 6 aýdanyndaǵy orman alqaptarynda aǵash dińderinen jupsyz jibek kóbeleginiń jumyrtqalaryn jáne zııankesterdiń jańa oshaqtarynyń paıda bolǵanyn baıqaǵan. Osyǵan baılanysty mamandar Aqqaıyń, Maǵjan Jumabaev, Jambyl, Qyzyljar, Aıyrtaý jáne Shal aqyn aýdandarynyń orman alqaptarynda qosymsha orman-patologııalyq tekserý júrgizip, zııankesterdiń qystan keıingi ómirsheńdigin jáne zaqymdanǵan aýmaqtyń kólemin anyqtady.

Tekserý qorytyndysy boıynsha oblysta jalpy aýmaǵy 22,3 myń gektardan asatyn orman alqabyn jibek kóbelegi zaqymdanǵany belgili boldy. Eń úlken oshaq Qyzyljar aýdanyndaǵy Qyzyljar jáne Sokolov orman sharýashylyqtarynda, sondaı-aq Jambyl aýdanyndaǵy Presnov orman sharýashylyǵynda tirkelgen.

Mamandar zııankestiń taralý deńgeıin jan-jaqty saralap, onymen kúresýdiń tıimdi tásili retinde hımııalyq óńdeýdi usyndy. Al mamyr-maýsym aılarynda orman alqaptaryn arnaıy preparatpen óńdeý bastaldy.

— Óńdeý jumystary «Detsıs Ekspert» preparatymen júrgizilip jatyr. Preparat janasý jáne qorektený arqyly áser etedi, bul juldyzqurttardy qysqa ýaqyt ishinde joıýǵa múmkindik beredi. Preparat ásirese juldyzqurttardyń jappaı paıda bolý — mamyr-maýsym aılarynda, belsendi qorektený kezeńinde tıimdi nátıje beredi, — deıdi mamandar.

Óńdeý jumystary júrgizilgen kezeńde jáne odan keıin belgili bir ýaqyt aralyǵynda mal jaıýǵa, sańyraýqulaqtar men jıdekter terýge, sondaı-aq aǵash shyrynyn daıyndaýǵa tyıym salynady. Sonymen qatar omartashylar da qaýipsizdik sharalaryn qoldanýy qajet.

Mamandardyń aıtýynsha, jupsyz jibek kóbelegi ásirese qaıyń-terektiń japyraǵyna áýes. Der kezinde shara qoldanylmasa, qurt jegen aǵash ósýin toqtatyp, shirip ketedi.

Buǵan deıin jibek kóbelegi Ertis ormanyna qaýip tóndirgenin jazǵan edik.