SQO-da 21 jastaǵy júrgizýshi jalǵan nómirmen júrgeni úshin jazalandy

PETROPAVL. KAZINFORM – Soltústik Qazaqstan oblysynda jyl basynan beri «Megakam.Qorǵaý» baǵdarlamasy arqyly 2 myńǵa jýyq kólik júrgizýshisi jazalandy.

SQO polıtsııa departamenti baspasóz qyzmetiniń málimetinshe, Astrahanka aýylynyń mańynan ótetin «Astana-Petropavl» tas jolynda «Toyota Camry» avtokóligin júrgizip kele jatqan 32 jastaǵy áıel toqtatyldy. «Intellektýaldy» beınekameralar onyń jol qozǵalysy erejesin birneshe ret buzǵandyǵyn tirkegen. Biraq júrgizýshi kelip túsken habarlamalardy elemegen. Polıtseıler júrgizgen profılaktıkalyq áńgimeden keıin ol jalpy somasy 380 myń teńge aıyppuldy tóledi. 

Polıtseılerdiń aıtýynsha, mundaı jaǵdaılar jıi kezdesedi. Bir apta buryn Petropavlda polıtseıler «Megakam.Qorǵaý» baǵdarlamasynyń kómegimen 21 jastaǵy stýdent basqaryp kele jatqan «Toyota Camry» kóligin toqtatty. Onyń jalǵan nómiri bar kólikti basqarǵany anyqtaldy. Qysqa ýaqyt ishinde ol jyldamdyqty 14 ret arttyrǵan, ózge de zańbuzýshylyqtarǵa jol bergen, bul – avtomatty beıne jazý júıelerimen tirkelgen.

«Jalǵan nómirdi paıdalanǵany úshin sot jas jigitti bir táýlikke ákimshilik qamaýǵa aldy, sondaı-aq bir jylǵa kólik júrgizý quqyǵynan aıyrdy. Budan bólek ol barlyq aıyppuldy tóleıdi. Qazirgi zamanǵy joldaǵy baqylaý quraldary zań buzýshylyqtardy birden tirkeıdi, ıaǵnı jazadan jaltarý múmkin emes. Júrgizýshilerdi zańdy talaptardy qatań saqtaýǵa shaqyramyz», - deıdi SQO PD ákimshilik polıtsııa basqarmasy bastyǵynyń mindetin atqarýshy Erlan Mádıev.

Jyl basynan beri polıtseıler «Megakam.Qorǵaý» baǵdarlamasy arqyly SQO avtojoldarynda 1975 jol erejesin buzýshyny toqtatty.

Buǵan deıin SQO-da 104 adam transplantatsııaǵa muqtaj ekenin jazǵan edik.