SQO-da 2,1 myń sý aıdynynyń tek júz shaqtysy ǵana resmı tirkelgen
PETROPAVL. KAZINFORM — Soltústik Qazaqstan oblysynda sharýalar sý qorǵaý aımaqtary men beldeýleriniń áli kúnge tolyq rásimdelmegenin aıtady.
Óńir kásipkerleri bızneske kedergi keltirip otyrǵan negizgi problemalardy kóterdi. Sonyń biri — oblystaǵy sý aıdyndaryna qatysty. Sý qorǵaý aımaqtarynyń mártebesi áli kúnge deıin resmı bekitilmegen. Bul júzdegen sharýashylyqtyń jumysyna qater tóndirip otyr.
Óńirdegi 2100-den astam sý aıdynynyń tek 92-si ǵana resmı túrde sý qorǵaý aımaǵy retinde rásimdelgen. Sharýalar ózen-kólderden 500 metr aýmaqta ornalasqan 600-den artyq jer telimin ıelengen. Biraq bul sý aıdyndary ákimdiktiń tıisti qaýlysynda kórsetilmegen. Sonyń saldarynan jerdi paıdalanýshylar kez kelgen ýaqytta ýchaskesinen aıyrylyp qalýy múmkin. Bul ondaǵan jyl boıy sharýashylyqtaryn damytyp, nesıe alyp, qomaqty qarajat quıǵan fermerler úshin úlken táýekel.
— Biz jyldar boıy bul jerde sharýashylyqty damytyp, mal sanyn arttyryp kelemiz. Memleket ony resmı túrde bergen, sý qorǵaý aımaqtarynyń shekaralary aktilerde naqty kórsetilgen. Alaıda eski qaýlydaǵy tehnıkalyq olqylyqtarǵa baılanysty qazir bizdiń zańdy quqyǵymyz kúmán týdyrýy múmkin.
Bul másele júzdegen sharýashylyqtyń, bizdiń qyzmetkerlerdiń taǵdyryna tikeleı áser etedi. Bizge naqty sheshim qajet: sý qorǵaý aımaqtaryn belgileý, olardy qujatqa engizý jáne adal eńbek etip ınvestıtsııa salǵan jer paıdalanýshylardyń quqyqtaryn zańdy túrde bekitý, — dedi «Grıgoreva E.V.» jeke kásipkerliginiń ókili Aıdos Keńbeıilov.
Aýyl sharýashylyǵy jáne jer qatynastary basqarmasynyń málimetinshe, qazirgi qorshaǵan ortany qorǵaý is-sharalar josparyna 11 aýdan men Petropavl aýmaǵyndaǵy sý aıdyndarynyń sý qorǵaý aımaqtary men beldeýleriniń jobalaryn ázirleý engizilgen.
2026-2027 jyldary 102 sý aıdyny boıynsha tıisti jumys júrgizilmek.
Buǵan deıin Jambyl oblysynda kásipkerlerge 290 mlrd teńge nesıe berilgenin jazǵan edik.