SQO-da 207 mlrd teńgeniń 22 memorandýmyna qol qoıyldy
Solardyń ishinde eń irileri - SQO ákimdigimen somasy 67,1 mlrd teńge avıatsııalyq zaýyttyń qurylysy boıynsha ınvestıtsııalyq jobany júzege asyrýda «Qazaqstannyń avıatsııa zaýyty» JSSh-men arada jasalǵan uzaq merzimdik kelisim, «Severnyı stroıtel» JShS-men (Reseı) 50,3 mlrd teńgeniń astyq tuqymdas jáne maıly daqyldar óńdeıtin keshen qurylysy, «Aıtszıý» (QHR) kompanııasymen Taıynsha aýdanynda somasy 13,7 mlrd teńgeniń agroónerkásip parkin qurý týraly kelisimder de bar.
«Maslo-Del Petropavlovsk» JShS-y «Tetra Pak Kazakhstan Ltd» JShS-nyń bas dırektory Dmıtrıı Galıshnıkovpen sút zaýytynyń óndiristik qýatyn keńeıtý úshin 4,5 mlrd teńgeniń qurylǵysyn jetkizý jóninde kelisimge keldi.
«Petropavl aýyr mashına jasaý zaýyty» AQ jáne «Podolskıı mashınostroıtelnyı zavod» AQ energetıkalyq mashına jasaý salasynda somasy 1,6 mlrd teńgeniń seriktestik týraly kelisimin jasasty.
Eske sala ketsek, «Kyzylzhar Invest 2016» halyqaralyq ınvestıtsııalyq forýmyna 7 eldiń ókilderi qatysty, onyń ishinde Italııa, Fınlıandııa, Shvetsııa, QHR jáne Reseı bar.