SQO-da 2029 jylǵa deıin 7 myń shaqyrym elektr jelisi jelisi jańartylady

ASTANA. KAZINFORM – Bıyl óńirde 400 shaqyrymnan astam elektr jelisi men 43 qosalqy stansa jáne transformator jóndeldi, dep habarlady Energetıka vıtse-mınıstri Suńǵat Esimhanov Petropavl qalasynda Soltústik Qazaqstan oblysy turǵyndarymen kezdesýi barysynda.

Kezdesý barysynda vıtse-mınıstr energetıka salasynda atqarylyp jatqan jumystar, jylytý maýsymynyń ótý barysy jáne energetıkalyq ınfraqurylymdardy jańǵyrtý sharalary týraly aıtqan.

Ol keltirgen málimetterge qaraǵanda, jylýmen qamtý salasynda tórt joba iske asyrylyp jatyr. Sonyń biri – Petropavl qalasyndaǵy Jabaev, Shajymbaev, Novaıa jáne Altynsarın kóshelerin qamtıtyn jańa jylý magıstralin salý. Budan bólek, 7,6 shaqyrym jylý jelisi qaıta jóndelip, jańartyldy.

Sondaı-aq jańǵyrtý jumystary «Energetıka jáne kommýnaldyq sektordy jańǵyrtý» ulttyq jobasy aıasynda 2029 jylǵa deıin jalǵasady. Jospar boıynsha aımaqta 7 myń shaqyrym elektr jelisi men 66 shaqyrym jylý jelisi jańǵyrtylatyn bolady.

Sonymen qatar, óńirdi elektrmen qamtýdyń senimdiligin arttyrý maqsatynda Ýálıhanov jáne Aqjar aýdandary aýmaǵynda 110 kV «Lenıngradskaıa – Talshyq – Kishkenekól» saqınaly elektr jelisin salý josparlanyp otyr.

Kezdesýde turǵyndar ınfraqurylymdy jańartý, óńirdi gazdandyrý jáne janar-jaǵarmaımen qamtamasyz etý máselelerin kóterdi. Vıtse-mınıstr Suńǵat Esimhanov barlyq suraqtarǵa naqty jaýap berip, aıtylǵan usynystar men ótinishter mınıstrlik pen tıisti mekemelerdiń qaraýyna alynatynyn jetkizdi.

Osyǵan deıin SQO-nyń 42 aýyly sapaly aýyzsýmen qamtamasyz etiletini týraly jazdyq.