SQO-da 2025 jyly apatty mektepter problemasy sheshiledi - Gaýez Nurmuhambetov
Soltústik Qazaqstan oblysynda 2025 jyly apatty mektepter problemasy sheshiledi. Bul týraly atalǵan oblystyń ákimi Gaýez Nurmuhambetov aıtty, dep habarlaıdy Kazinform.
«Bıýdjettiń úshten bir bóligi bilim berý salasyna baǵyttalǵan. Bıyl qarjylandyrý mólsheri ótken jylmen salystyrǵanda shamamen 19 paıyzǵa ulǵaıdy. Materıaldyq-tehnıkalyq baza 4,4 mlrd teńgege jańartyldy. Mektepter úshin 55 pándik kabınet satyp alynyp, 29 mektepke avtobýs berildi. 4,3 mlrd teńgege 48 nysanda kúrdeli jóndeý jumystary júrgizildi. Apattyq jaǵdaıda turǵan mektepterdiń ornyna 720 oryndyq 2 mektep qoldanysqa berildi. Sondaı-aq, Taıynsha aýdanynyń Dragomırovka eldi mekeninde 120 oryndyq mektep salý josparlanyp otyr. Osylaısha, apatty mektepterdi joıý máselesi 2025 jylǵa qaraı sheshiletin bolady», - dedi óńir ákimi Ortalyq kommýnıkatsııalar qyzmetindegi brıfıngte.
Onyń atap ótýinshe, bilim berý ınfraqurylymyn qoldaý qory esebinen «Bereke» shaǵyn aýdanynda 50 oryndyq ınternaty bar 300 oryndyq túzetý mektebiniń qurylysy júrgizilýde. Nysan búginde 50 paıyzǵa daıyn. Oqýshylarǵa oryn tapshylyǵyn qysqartý úshin (900 oryndyq 2 aýyldyq mektep salý da josparda bar. 3 jyl ishinde «Jaıly mektep» Ulttyq jobasy aıasynda 2700 oryndyq 4 mektep salynady.
«Petropavlda 420 oryndyq 2 balabaqsha salý josparlanǵan. Bul balalardyń 95 paıyzyn mektepke deıingi tárbıemen jáne oqytýmen qamtýǵa múmkindik beredi. Infraqurylymdy jaqsartý, jalpy bilim berý protsesine qatysýshylar úshin qolaıly jaǵdaı jasaý arqyly bilim berý deńgeıiniń sapasyn arttyrýǵa áser etedi», - dedi Gaýez Nurmuhambetov.
