SQO-da 200 polıtseıge sybaılas jemqorlyq týraly dáris oqyldy

PETROPAVL. QazAqparat – Petropavlda Sybaılas jemqorlyqqa qarsy qyzmet janyndaǵy oblystyq aqparattyq-nasıhat shtabynyń ókilderi qalalyq polıtsııa basqarmasy basshylyǵy jáne jeke quram aldynda dáris oqyp, olardy syılyqtardan bas tartýǵa, elge adal qyzmet etýge shaqyrdy, dep habarlaıdy QazAqparat tilshisi.

SQO aqparattyq-nasıhat shtaby ókilderiniń pikirinshe, memlekettik organdardyń qyzmetkerleri, ásirese basshylyq quram ózderiniń kúndelikti is-áreketimen halyqqa adal qyzmet etýde úlgi kórsetýi qajet.

«Memlekettik organdardyń basshylyq quramy ózderine artylǵan jaýapkershilikti túsinip, kúndelikti jumysynda basqalarǵa úlgi kórsetýi tıis. Sybaılas jemqorlyqpen kúresý maqsatynda qolǵa alynǵan agenttiktiń bastamasyn Memleket basshysy qoldady. Budan bylaı qol astyndaǵy qyzmetkerleri barmaq bastylyq, kóz qystylyqqa jol bergen jaǵdaıda barlyq deńgeıdegi basshylary jaýap beredi», - dep atap ótti shtab jetekshisi Jangeldi Tájın.

Petropavl qalalyq polıtsııa basqarmasynyń jeke quramymen kezdesý barysynda Sybaılas jemqorlyqqa qarsy is-qımyl agenttiginiń oblystyq departamenti ınspektory Svetlana Zaıtseva sybaılas jemqorlyqqa qarsy jańa saıasat jaıynda jáne iske asyp jatqan jobalar týraly aıtyp berdi.

Onyń aıtýynsha, búginde sybaılas jemqorlyqtyń aldyn alý is-sharalary kúsheıtilgen. Sondaı-aq para alǵandarǵa júkteletin jaýapkershilikti de taǵy bir márte eske saldy.

«Biz eshkimge eshteńe syılamaýǵa jáne eshkimnen syılyq almaýǵa keńes beremiz. Qyzmet barysynda kómektesip, keıin azamattyń alǵys retinde syılyq ákeletin kezderi bolady. Alaıda olar jaýapkershilikti umytady. Óıtkeni berýshige de, syılyqty alýshyǵa da jaza qarastyrylǵan. Eger quny eki AEK tómen bolsa – ákimshilik, odan joǵary bolsa – qylmystyq jaza qoldanylady. Salynatyn aıyppuldyń mólsheri de joǵary», - dedi Svetlana Zaıtseva.