SQO-da 200 myńǵa jýyq adam PTR test tapsyrdy
PETROPAVL. QazAqparat – Soltústik Qazaqstan oblysynda koronavırýstan pandemııa bastalǵaly 197080 adamnan PTR test alyndy, dep habarlaıdy QazAqparat tilshisi.
SQO Sanıtarııalyq-epıdemıologııalyq baqylaý departamenti baspasóz qyzmetiniń málimetinshe, oblysta PTR zertteýler júrgizetin 4 zerthana jumys isteıdi. Pandemııa kezeńinen bastap óńirde KVI-ǵa 197080 zertteý júrgizildi. Sonyń tek 4%-de ǵana oń nátıje alyndy.
Búginde PTR ádisimen júrgiziletin zertteýlar shamamen 3 esege qysqardy. Ótken táýlikte osyndaı 544 zertteý júrgizildi. Bul - koronavırýsty juqtyrǵandardyń azaıýyna jáne karantın talaptarynyń jeńildetilýine baılanysty. KVI órshigen ýaqytta óńirden tek PTR testtiń nátıjesimen ǵana shyǵý múmkin bolǵan edi.
Mamandardyń aıtýynsha, 19 jeltoqsanda SQO-da qaýipti ınfektsııany juqtyrýdyń 66 jaǵdaıy tirkeldi. Sonyń 55-inde aýrý belgileri bolǵan. Eń kóp aýyrǵandar – 34 adam Petropavlda tirkeldi. Ekinshi orynda Reseımen shekaralas jatqan Mamlıýt aýdany tur, munda jańadan 13 jaǵdaı anyqtalǵan. Al Aıyrtaý aýdanynda 5 adam KVI juqtyrǵan.
Jalpy óńirde koronavırýsty juqtyrýdyń 7903 jaǵdaıy tirkeldi, onyń ishinde 4696-synda aýrý belgileri bolǵan.
