SQO-da 200-den astam sý aıdynynda sý qorǵaý aımaqtary men beldeýleri belgilendi
PETROPAVL. KAZINFORM – Bul jumys Soltústik Qazaqstan oblysyndaǵy ózen-kóldiń lastanýyn, bitelýin jáne sarqylýyn boldyrmaý maqsatynda qolǵa alyndy.
SQO tabıǵı resýrstar jáne tabıǵat paıdalanýdy retteý basqarmasynyń málimetinshe, 2026 jylǵy 19 aqpanda oblys ákimdiginiń №41 qaýlysyna sáıkes Esil basseınine qaraıtyn mańyzdy 109 sý nysany qamtyldy. Olardyń ishinde óńirdiń basty sý arterııasy - Esil ózeni jáne eki iri salasy - Aqanburlyq jáne Imanburlyq, Kishi Jembaraq, Muqyr, Araltóbe, Qamysaqty, Sharyq, Babyburlyq, Bıteke, Shaǵalaly ózenderinde, sondaı-aq Sharyq sý qoımasynda, Shýdasaı, Shat, Qulanaıǵyr, Semizbaı ózenderiniń ýchaskeleri bar. Sondaı-aq 91 kólde sý qorǵaý aımaqtary, beldeýleri jáne sharýashylyqqa paıdalanýdyń shekteýli rejımi engizildi.
Sý qorǵaý aımaqtarynyń belgilenýi týraly turǵyndarǵa eskertý jasaý jáne qorǵaý talaptaryn túsindirý maqsatynda óńirdegi sý nysandarynyń boıyna 720 arnaıy belgi ornatyldy. Onyń ishinde 550 belgi Esil ózeniniń jaǵalaýyna qoıylsa, Aqanburlyq pen Imanburlyq ózenderine 64 belgi, al 62 kóldiń aýmaǵyna 106 belgi ornalastyryldy.
Mamandardyń aıtýynsha, tabıǵatty qorǵaý tek zańmen nemese belgilermen shektelmeıdi. Tabıǵatty qorǵaýdyń eń tıimdi joly – ár adamnyń jaýapkershiligi. Bir bótelkeni nemese polıetılen paketti sý jaǵasyna tastamaýdyń ózi ózen men kólderdi saqtaýǵa kómektesedi.
Jyl saıyn oblysta ózen-kól jaǵalaýlaryn tazartý boıynsha ekologııalyq aktsııalar uıymdastyrylady. Bul bastamaǵa joǵary oqý oryndarynyń stýdentteri, jastar uıymdarynyń músheleri, memlekettik mekeme qyzmetkerleri belsendi qatysady. Olar jaǵalaýlardy turmystyq qaldyqtardan tazartyp, turǵyndar arasynda ekologııalyq mádenıetti qalyptastyrýǵa úles qosyp jatyr.
Buǵan deıin Májilis depýtaty Ashat Raqymjanov Sý resýrstary jáne ırrıgatsııa mınıstri Nurjan Nurjigitovtiń atyna depýtattyq saýal joldap, Qazaqstandaǵy sý resýrstaryn tıimsiz paıdalaný máselesin kótergenin jazǵan edik.
