SQO-da 200 bala Prezıdenttiń atynan jańa jyldyq syılyqqa ıe boldy
PETROPAVL. QazAqparat – Soltústik Qazaqstan oblysynda Prezıdent Qasym-Jomart Toqaevtyń atynan 200 balaǵa Aıaz ata men Aqshaqar syılyq úlestirdi, dep habarlaıdy QazAqparat tilshisi.
Dástúrli prezıdenttik shyrsha bıyl «Ǵajaıypqa toly Jańa jyl!» ataýymen uıymdastyrylyp, onlaın formatta ótti. SQO-da merekelik sharany balalar áleýmettik jeli jáne oblystyq telearna arqyly tamashalaýǵa múmkindik aldy.
Al úzdik oqýshylarǵa, túrli baıqaýlardyń jeńimpazdaryna, jetim jáne múgedek balalarǵa, kóp balaly jáne az qamtylǵan otbasylardyń balalaryna, erekshe bilim berýdi qajet etetin búldirshinderge – barlyǵy 200 adamǵa Prezıdent Qasym-Jomart Toqaevtyń atynan jańa jyldyq syılyqtar úlestirildi. SQO ákimi Qumar Aqsaqalov oqýshylardy onlaın quttyqtap, tilegin jetkizdi.
Syılyqqa ıe bolǵandardyń biri - LORD daryndy balalarǵa mamandandyrylǵan mektep-lıtseı-ınternatynyń oqýshysy Áıgerim Esmanova. 10 jasar Áıgerim oblystyq jáne respýblıkalyq týrnırlerdiń jeńimpazy. Ol mýzyka, kórkem gımnastıka jáne shahmat úıirmelerine qatysady.
«Meni Prezıdenttiń quttyqtaǵanyna óte qýanyshtymyn. Ol kisini de kele jatqan merekemen quttyqtap, uzaq ǵumyr tileımin. Іndetten qutylyp, eshkim aýyrmasa eken dep tileımin. Tezirek synyptaǵy dostarymdy kórgim keledi», - deıdi Áıgerim Esmanova.
SQO bilim basqarmasy baspasóz qyzmetiniń málimetinshe, balalarǵa Prezıdent atynan quttyqtaý hat, tátti syılyqtar, planshet jáne qazaq ertegileri men Abaıdyń kitaptary tabys etildi.
