SQO-da 20 jastaǵy jigit sýǵa ketip, mert boldy

PETROPAVL. KAZINFORM – Soltústik Qazaqstan oblysynda «Chernoe» kóline sýǵa shomylýǵa barǵan 20 jastaǵy jigit mert boldy.

SQO tótenshe jaǵdaılar departamenti baspasóz qyzmetiniń málimetinshe, oqys oqıǵa keshe 1 shilde kúni saǵat 22.10 mınýt ketkende bolǵan. Qyzyljar aýdany Prıbrejnoe eldi mekeniniń mańynda ornalasqan «Chernoe» kóline demalýǵa barǵan 20 jastaǵy jigit sýǵa túsip, qaıtyp shyqpaǵan.

«Belgisiz jaǵdaıda joǵalǵan 2003 jyly týǵan er adamdy izdeýge tótenshe jaǵdaılar departamentiniń jeke quramynan 3 adam, 5 qutqarýshy, qaıyq jáne 3 tehnıka jumyldyryldy. Sondaı-aq oqıǵa ornynda polıtsııanyń 5 qyzmetkeri jáne 2 tehnıkasy jumys istedi. Saǵat 22.45 mınýt ketkende jigittiń denesi tabyldy. Qazirgi ýaqytta ólimniń sebebi anyqtalyp jatyr, sot-medıtsınalyq saraptama taǵaıyndaldy», - delingen baspasóz habarlamasynda.

SQO-da jaz bastalǵaly bul sýda bolǵan tórtinshi qaıǵyly oqıǵa. Buǵan deıin úsh jasóspirim sýǵa batyp ketken edi. 

Sondaı-aq buǵan deıin SQO Qyzyljar aýdanynda tasqyn kezinde qyrylǵan malǵa 2,4 mln teńge ótemaqy berilgendigin jazǵan edik.