SQO-da 20 gıdrotehnıkalyq qurylystyń beseýine jóndeý qajet

PETROPAVL. QazAqparat – Soltústik Qazaqstan oblysynyń aýmaǵynda 20 gıdrotehnıkalyq qurylys nysany ornalasqan. Ýálıhanov aýdanyndaǵy Sharyq sý toraby men «Segiz kóz» segiz terezeli ótkizý qurylysy apatty jaǵdaıda tur, dep habarlaıdy QazAqparat tilshisi.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, óńirdegi 20 gıdrotehnıkalyq qurylys nysanynyń 6-y respýblıkalyq menshikte, 13-i kommýnaldyq menshikte, 1-i jeke menshikte.

Oblys ákiminiń ókimine sáıkes jyl saıyn barlyq múddeli memlekettik organdardyń qatysýymen sý tasqyny aldynda jáne sý tasqynynan keıingi kezeńde gıdrotehnıkalyq qurylystardyń jaǵdaıy tekseriledi. Bul nysandardyń menshik ıelerine ony tehnıkalyq jaramdy kúıde ustaý jáne tasqyn sýdy qaýipsiz ótkizýdi qamtamasyz etý jóninde sharalar qabyldaýǵa usynymdar beriledi.

«Bıyl sý tasqyny aldynda qurylystardy tekserý barysynda jumys toby birneshe olqylyqty anyqtady. Máselen eki gıdrotehnıkalyq qurylys apatty jaǵdaıda tur. Olar - Sharyq sý toraby – menshik ıesi «Qazsýshar» RMK SQF jáne «Segiz kóz» 8 terezeli ótkizý qurylysy - Ýálıhanov aýdanynyń turǵyn úı-kommýnaldyq sharýashylyǵy bólimi jaýapty.

3 qurylysqa qanaǵattanarlyqsyz jaǵdaıda degen baǵa berildi. Olar - «Qyzyljar Sý» JShS qaraıtyn «Bıoprýd» jınaqtaýshy toǵanynyń qorshaý bógetiniń 50%, «Tazartqysh sýtartqysh jáne sý ótkizgish ǵımarattar» ShJQ MKK menshigindegi Petropavldyń Ýşev kóshesi boıyndaǵy Esil ózeninen qorǵaýshy bóget jáne Ýálıhanov aýdany Amangeldi aýyldyq okrýg ákiminiń apparatyna qaraıtyn Tileýsaı aýylyndaǵy sý kótergish bóget», - deıdi basqarma mamandary.

Al gıdrotehnıkalyq qurylystardy fýnktsıonaldyq maqsaty boıynsha qaýipsiz paıdalanýdy, olardyń tehnıkalyq jaı-kúıiniń qaýipsiz deńgeıin, sondaı-aq tehnıkalyq qyzmet kórsetýdi, aǵymdaǵy jóndeýdi jáne jańǵyrtýdy olardyń menshik ıesi nemese paıdalanýshy uıym qamtamasyz etýi tıis.