SQO-da 20 adam «dońyz» tumaýyna shaldyqty

PETROPAVL. QazAqparat – Soltústik Qazaqstan oblysynda epıdemıologııalyq maýsym bastalǵaly 30 myńǵa jýyq adamǵa jedel respıratorly vırýstyq ınfektsııaǵa, 269 adam tumaýǵa shaldyqty, dep habarlaıdy QazAqparat tilshisi.

SQO ákimdiginde óńirdegi epıdemıologııalyq jaǵdaıǵa baılanysty jıyn ótti. Oǵan sebep joq emes, JRVI-men aýyrý 1,6 ese, tumaýdy juqtyrý 7,7 ese artqan.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, 1 qazan – jańa epıdemıologııalyq maýsym bastalǵaly óńirde 29 581 adam JRVI juqtyrǵan, ótken jyly 18 myńǵa jýyq adam aýyrǵan. Sondaı-aq bıyl aýyrǵandardyń 65% - 14 jasqa deıingi bala.

«14 qazannan beri óńirde grıpti juqtyrýdyń 269 jaǵdaıy tirkeldi. Byltyr nebary 35 adam aýyrǵan edi. Bıylǵy 20 jaǵdaı «dońyz» tumaýyna qatysty. 4 adamǵa H3N2, ıaǵnı «gonkong» tumaýy dıagnozy qoıyldy.

Aýyrǵandardyń 52-si – júkti áıel, 84-i 14 jasqa deıingi bala», - deıdi Áset Jumataev.

Tumaýdy juqtyrǵandardyń basym bóligi Petropavl qalasynyń turǵyndary.

«Epıdemıologııalyq maýsym bastalǵaly 16 qańtarǵa deıin JRVI-men statsıonarlarda 748 adam jatyp, em alyp shyqty. Olardyń 96-sy júkti áıel, 599-y – bala. Jalpy aýyrǵandardyń 65% - balalar.

Koronavırýs ınfektsııasy kezinde mektepterde balalar qashyqtan bilim aldy, balabaqshalar jumys istegen joq. Saldarynan balalarda tıisinshe ımmýnıtet qalyptaspady. Sondyqtan búginde olar jıi aýyratyn bolǵan», - deıdi SQO densaýlyq saqtaý basqarmasynyń basshysy Qumar Kúsemisov.

Oblystyń bas dárigeriniń aıtýynsha, statsıonarlarda tumaýmen 10 adam jatty, taǵy altaýy «dońyz» tumaýynan emdelgen.