SQO-da 2 jasar sábı terezeden qulap, aman qaldy
PETROPAVL. QazAqparat – Soltústik Qazaqstan oblysynda 2 jasar qyz terezeden qulap, aman qaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 26 tamyzda Qyzyljar aýdanynyń Beskól aýylynda bolǵan. 2 jasar qyz eki qabatty úıdiń ekinshi qabatynyń terezesinen qulap ketken.
Sábı aman, birden oblystyq balalar aýrýhanasyna jetkizildi. Qazir, medıtsına qyzmetkerleriniń aıtýynsha, jaǵdaıy qalypty.
Polıtsııa qyzmetkerleri atalǵan fakti boıynsha tekseris júrgizip jatyr. Ata-anasy qyz balany joǵary synypta oqıtyn qyzdarynyń qaraýyna qaldyrǵan. Sábı abaısyzda terezeden qulap ketken. Osy derek boıynsha materıaldar kámeletke tolmaǵandardyń isteri jónindegi komıssııanyń qaraýyna shyǵarylady.
Tártip saqshylary bala tárbıesine jaýapkershilikpen qaraýdy, eresekterdiń qaraýynsyz qaldyrýǵa bolmaıtynyn eske salady. Sábıleri bar otbasylar jazataıym oqıǵaǵa jol bermeý úshin terezege buǵattaý qurylǵylaryn ornatqandary jón. Sonymen qatar, bala tereze jaqtaýyna shyqpaýy úshin oryndyqtar men basqa da jıhazdy onyń mańynan alǵan jón.
Buǵan deıin alımentten jaltarǵan ata-analardyń balalary aldyndaǵy qaryzy 320 mln teńgeden asyp ketkenin aıtqan edik. Boryshyn atqarýdan qashyp júrgen 291 adamnyń 11-i – áıel. 85 boryshker ákimshilik jaýapkershilikke tartylsa, altaýy qamaýǵa alyndy.
