SQO-da 2 myńnan astam nysan jumysyn jandandyrdy
PETROPAVL. QazAqparat – Soltústik Qazaqstan oblysynda Infokazakhstan.kz platformasyna 3 myńnan astam kásipkerlik nysany tirkelse, sonyń 2 myńnan astamy jumysyn bastaýǵa ruqsat aldy, dep habarlaıdy «QazAqparat» HAA tilshisi.
SQO kásipkerler palatasy baspasóz qyzmetiniń málimetinshe, 993 bıznes-sýbektisi sanıtarlyq-epıdemıologııalyq qyzmettiń tekserisinen ótkennen keıin ǵana iske kirispek. Olar: saýda úıleri, qoǵamdyq tamaqtaný oryndary, sulýlyq salondary men shashtarazdar, balalarǵa arnalǵan bilim berý mekemeleri men taǵy basqalary.
Elimizdik Bas sanıtarlyq dárigeriniń Qaýlysymen karantınnen keıin iske kirisý úshin www.infokazakhstan.kz portalynda tirkelý qajet. Bul mindetti shart oryndalmaǵan jaǵdaıda aıyppul salynýy múmkin.
«Búgingi kúnge Infokazakhstan.kz platformasynda 3 myńnan astam kásipkerlik nysany tirkeldi. Onyń eki myńnan astamy ruqsat alsa, qalǵany SES pen monıtorıngilik toptyń tekserisinen ótýi qajet. Ózderińiz baıqaǵandaı, kásipkerlik nysandarynyń keıbiri tekserissiz jumysyn jandandyrady. Bas sanıtarııalyq dárigerdiń Qaýlysyna sáıkes bıznestiń 90% habarlandyrý tártibimen iske kirisedi. Olarǵa monıtorıngilik toptyń kelýin kútýdiń qajeti joq», - deıdi SQO kásipkerler palatasy dırektorynyń orynbasary Jeńis Qazıev.
Monıtorıngilik toptar kásipkerlik qyzmettiń bes túrin tekserip baryp qana jumystaryn jandandyrýǵa ruqsat beredi. Olardyń qatarynda saýda úıleri, bazarlar, balalardyń saýyqtyrý lagerleri, boýlıng jáne bılıard zaldary bar.
«Kásipkerler palatasynyń ókilderi de monıtorıngilik toptyń quramyna engen. Nysandar ashylmas buryn aralap, olardyń daıyndyǵyn tekseremiz, olqylyqtar bolsa joıýǵa keńes beremiz. Bas sanıtarııalyq dárigerdiń Qaýlysyna sáıkes kásipkerler ǵımarattaryn kvartstaý kerek. Qaýly juma kúni shyqty. Demalys kúnderi kvartstaý quralyn satyp alý múmkin bolmady. Sol sebepti biz bul buıymdy satýmen aınalysatyn kásipkerlerdiń tizimin jasap, tarattyq. Talap boıynsha budan basqa antıseptıkterdiń, turmystyq hımııanyń qory jáne jeke qorǵanysh zattary – maskalar men qolǵaptar bolýy qajet. Áleýmettik ara qashyqtyqtyń saqtalýyn qamtamasyz etýleri qajet. Kásipkerlerdi bul talaptardy buljytpaı oryndaýǵa shaqyramyn», - deıdi Jeńis Qazıev.
