SQO-da 2 mlrd teńgeniń faner zaýyty iske qosyldy

PETROPAVL. QazAqparat – Soltústik Qazaqstan oblysynda túrik ınvestorlarynyń qarjylandyrýymen aǵash shere shyǵaratyn zaýyt iske qosyldy, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, faner óndirý kombınatyn ashýǵa 2 mlrd teńge ınvestıtsııa quıyldy. Túrikterdiń qatysýymen iske qosylǵan jańa kásiporynda 150 adam eńbek etedi.

Zaýyt jylyna 18 myń tekshe metr daıyn ónim shyǵarmaq. Keıin ony 27 myńǵa deıin arttyrady. Ónimniń jartysy Túrkııa, Eýropa men Ózbekstanǵa jóneltiledi. Qazir elimizge 90 myń tekshe metr faner syrttan ákelinedi. Soltústikqazaqstandyq kombınat bul kólemniń 30% jabatyn bolady.

«Aımaqqa otandyq ınvestorlardan basqa sheteldik kapıtal da tartylyp jatyr. Sheteldik ınvestorlardyń oblysqa kelýi olarǵa bıznesti damytý úshin munda qolaıly jaǵdaı jasalǵanyn kórsetedi. 11 aıda syrtqy ınvestıtsııa kólemi 36%-ke ósti. Jalpy alǵanda, óńirge 226 mlrd astam teńge tartyldy. Ósim 20%. Jalpy SQO-da quny 900 mlrd teńgeden asatyn 53 ınvestıtsııalyq jobadan turatyn pýl quryldy. Olardy júzege asyrý arqyly jańadan 7 myńnan astam adamdy jumyspen qamtımyz», - deıdi SQO ákimi Qumar Aqsaqalov.

Qazaqstannyń Túrkııadaǵy elshiliginiń kómegimen pandemııaǵa qaramastan qajetti qondyrǵylar jáne ony qurýǵa qajetti mamandar der kezinde jetkizildi. Al, «KAZAKH INVEST» ulttyq kompanııasy ınvestorǵa ınvestıtsııalyq kelisimshartqa otyrýǵa jáne qymbat qondyrǵyny shekaradan kedendik salyqsyz ótkizýge kómektesti.