SQO-da 2 myńǵa jýyq jas memlekettik tapsyrys boıynsha jumysshy mamandyqtarǵa oqyp jatyr

PETROPAVL. KAZINFORM – Soltústik Qazaqstan oblysynda jumysshy mamandyqtarǵa oqytatyn 13 kolledj jumys isteıdi.

SQO bilim basqarmasynyń málimetinshe, óńirde jalpy 24 kolledj bolsa, sonyń beseýi – jekemenshik. Mamandyqtar óńir ekonomıkasynyń 11 negizgi salasyn: aýyl sharýashylyǵy, qurylys jáne kommýnaldyq sharýashylyq, ónerkásip, energetıka, kólik, aqparattyq tehnologııalar, bilim berý, densaýlyq saqtaý, mádenıet, qyzmet kórsetý salasy, aýyl sharýashylyǵy ónimderin qaıta óńdeýdi qamtyǵan. Jalpy 67 mamandyq jáne 105 biliktilik boıynsha oqytylady.

- Kolledjderdi bitirip, mamandyq alyp shyqqan jastardyń jumysqa ornalasýyn taldaıtyn bolsaq, jalpy qurylys jumystarynyń sheberleri - 88%, tehnık-elektrıkter - 86%, aýyl sharýashylyǵy jabdyqtarynyń slesar-jóndeýshileri - 86%, aspazdar - 81%, omartashylar 80% jumysqa ornalasty, - deıdi basqarma basshysy Aınagúl Suraǵanova.

Jas mamandar eńbek naryǵynda básekege qabiletti bolýy úshin oblysta dýaldy oqytý qolǵa alynǵan. Bul júıe 21 kolledjde 30 mamandyq boıynsha engizildi, 342 seriktes kásiporynmen kelisim bar. Memlekettik tapsyrys boıynsha bilim alatyn 2406 stýdent nemese 25% qamtylǵan.

- Kolledjder men seriktes kásiporyndar arasynda barlyǵy 1,1 myńnan astam shart bar. Kásiporyndarda óndiristik tájirıbeden 2347 stýdent ótti, onyń ishinde 996 adam nemese 42% eńbekaqy aldy.

Memleket basshysynyń tapsyrmalaryn oryndaý úshin oblystyń 17 kolledji oblystyń 17 iri kásipornymen memorandýmdarǵa qol qoıdy, bul eńbek naryǵyn suranysqa ıe kadrlarmen qamtamasyz etýge járdemdesedi.

10 aýyldyq kolledjde aýyl sharýashylyǵy salasy mamandary úshin dýaldy oqytý engizildi. Óndiristik tájirıbeden ótý kezinde áleýmettik áriptester stýdentterdi jumys oryndaryna kólikpen jetkizip, arnaıy kıimmen, ystyq tamaqpen qamtamasyz etti, - deıdi Aınagúl Suraǵanova.

Kolledjderdi qarjylandyrýǵa byltyr 10 482,9 mln teńge bólinse, bıyl osy maqsatqa 13 248,3 mln teńge josparlanǵan. Bıyl sondaı-aq jumysshy kadrlerdi ázirleýge memlekettik tapsyrysty 39%-ten 45% deıin ulǵaıtylmaq.

Qazir SQO kolledjderinde 11 myńnan astam stýdent oqıdy, onyń ishinde 9,5 myńy nemese 85% memlekettik tapsyrys boıynsha bilim alyp jatyr.

Buǵan deıin SQO-da 150 myń adamnyń járdemaqysy men zeınetaqysy óskenin jazǵan edik.