SQO-da 2 aýyl turǵyny bireýdiń kóligin aıdap áketip, dúken tonady
PETROPAVL. QazAqparat – Soltústik Qazaqstan oblysynda bireýdiń kóligin minip ketip, keıin aýyl dúkenin tonady degen kúdikpen Jambyl aýdanynyń eki turǵyny ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa Jambyl aýdanynda bolǵan. 20 tamyz kúni patrýldik polıtsııa batalonynyń qyzmetkerleri «Mamlıýtka-Qostanaı» tas jolynyń Novorybınka jáne Mırolıýbovo eldimekenderiniń arasyndaǵy jol jyrasyna túsip ketken «VAZ-2107» markaly avtokólikti kóredi.
Kóliktiń qasynda 65 jastaǵy ıesi bolǵan. Qarııa aýdan ortalyǵy Presnovkadan shyǵar jolda kóligine eki jolaýshy alǵan. Jolda olar oǵan shabýyl jasaǵan. Qaskóıler aýyl turǵynyna qoqan-loqy kórsetip, kóliktiń kilti men telefonyn alyp qoıǵan. Biraq qarııany kólikte qaldyrǵan. Shabýyl jasaǵandardyń biri rólge otyryp, kólikti basqara almaı joldan shyǵyp ketken. Kólik ıesin mashınanyń qasynda qaldyryp, ózderi ótip bara jatqan kólikpen ketip qalǵan.
Kóp uzamaı polıtsııanyń kezekshi bólimine Kladbınka eldimekenindegi dúkenge qaraqshylyq shabýyl jasalǵany týraly habarlama kelip túsedi. Belgisiz ekeý kúsh qoldanyp, 47 jastaǵy satýshyǵa shabýyl jasaǵan. Kassadan 44 400 teńgeni alyp, izin sýytqan.
Jambyl aýdandyq polıtsııa bóliminiń jeke quramy dabyl boıynsha qylmyskerlerdi izdeýge jumyldyryldy. Beketter qoıylyp, aýyl baqylaýǵa alyndy. Іzdestirý barysynda qylmysqa kúdiktiler aýyl shetinen spırttik ishimdik iship otyrǵan jerinen tabyldy.
Atalǵan faktiler Sotqa deıingi tergep-tekserýdiń biryńǵaı tizilimine engizildi. 1985 jyly jáne 1992 jyly týǵan ekeý buryn túrli qylmys jasaǵany úshin sottalǵan eken.
Kúdiktiler qamaýǵa alyndy.
