SQO-da 19 ǵasyrdaǵy Islam mádenıetiniń eskertkishi – tastan qalanǵan meshit jóndeledi
PETROPAVL. QazAqparat – Soltústik Qazaqstan oblysynda bıyl birqatar tarıhı-mádenı mańyzy bar nysan kúrdeli jóndelmek. Sonyń biri – Petropavldaǵy 1870 jyly tastan qalanǵan meshit, dep habarlaıdy QazAqparat tilshisi.
SQO mádenıet, tilderdi damytý jáne arhıv isi basqarmasy jetekshisiniń mindetin atqarýshy Dosbol Ábdirıisov óńirlik kommýnıkatsııalar qyzmetiniń brıfınginde salaǵa qatysty josparlarmen bólisti.
Mamannyń aıtýynsha, bıyl mádenıet salasyna 6,6 mlrd teńge bólingen. 2601 adam eńbek etse, olardyń ortasha eńbekaqylary 105 myń teńge shamasynda.
Bıyl óńirde memlekettik baǵdarlamalar aıasynda Aqsýat aýylynda mádenı-saýyqtyrý ortalyǵynyń qurylysy bastalmaq. Birneshe eldi mekende aýyl klýbtary, aýdandyq mádenıet úıleri jónge keltirilip, 10 aýdandaǵy mádenı-saýyqtyrý ortalyqtaryna kerek-jaraq alynbaq.
«2020-2024 jyldarǵa arnalǵan tujyrymdamaǵa sáıkes, respýblıkalyq bıýdjetten birqatar nysandarda ǵylymı-qalpyna keltirý jumystaryna qarajat bólindi. Solardyń ishinde «Syrymbat» qonysy bar. Bıyl 25 mln teńge jumsalmaq. «Botaı» qonysyna bıyl 10 mln, keler jylǵa 15 mln teńge bólindi. Qarasaı-Aǵyntaı batyrlardyń memorıaldyq keshenine 2023 jyly 22,5 mln, Abylaıhan rezıdentsııasyna 2022 jyly 21,9 mln teńge jumsalady», - deıdi Dosbol Ábdirıisov.
Budan basqa SQO-ny 2021-2025 jyldary áleýmettik-ekonomıkalyq damytý keshendi jospary aıasynda «Qyzyl Oba», «Aq-Irıı», «Baıqara» arheologııalyq eskertkishterinde aýyqmdy jumystar júrgiziledi. Osy maqsatqa 202 mln teńge kezeń-kezeńmen bólinbek.
Petropavlda bıyl «QYZYLJAR art center» atty óz arbaty paıda bolmaq. Art-ortalyq úsh aımaqtan: saýda pavılonynan, aqparattyq-kórme ortalyǵynan jáne qolóner sheberleriniń sheberhanalarynan quralmaq.
Aqan Seri atyndaǵy oblystyq fılarmonııa ǵımaraty da jóndeledi. Ólketaný mýzeıiniń ekspozıtsııa zaldary jańarady. Oblys ortalyǵynda jergilikti sýretshilerge óz kórmelerin uıymdastyrýǵa múmkindik beretin «BOTAI» zamanaýı kórkem galereıa paıda bolmaq.
« Petropavlda HH ǵasyrdyń basynda alty tastan qalanǵan jáne úsh aǵashtan istelgen meshit bolǵan. Solardyń biri – kópes Dáýletkeldıevtiń 1870 jyly salynǵan meshiti. Tastan qalanǵan meshit qazir Kırov atyndaǵy zaýyttyń aýmaǵynda ornalasqan. Onyń buryn meshit bolǵanyn qasynda saqtalǵan munarasynan baıqaýǵa bolady. Bul – 19 ǵasyrǵa jatatyn Islam mádenıetiniń eskertkishi», - deıdi SQO mádenıet, tilderdi damytý jáne arhıv isi basqarmasy jetekshisiniń mindetin atqarýshy Dosbol Ábdirıisov.
