SQO-da 19 eldi mekenniń bolashaǵy bulyńǵyr
PETROPAVL. QazAqparat - Soltústik Qazaqstan oblysynda Óńirlerdi damytýdyń 2020 jylǵa deıingi baǵdarlamasyna oraı eldi mekenderdiń potentsıalyn baıqaý maqsatynda monıtorıng júrgizilip jatyr, dep habarlaıdy QazAqparat tilshisi.
SQO ekonomıka basqarmasynyń málimetinshe, búgingi tańda SQO-da 649 eldimeken bar. Mundaǵy halyqtyń sany 310 myńnan asady, bul jalpy óńir halqynyń 55,9%. Eldimekenderdiń áleýmettik-ekonomıkalyq jaǵdaıyn anyqtaý maqsatynda QR Ulttyq ekonomıka mınıstrliginiń tapsyrysymen monıtorıng júrgizilip jatyr. Aýyldar birneshe ólshemshart boıynsha saralanady. Aldyn ala esep boıynsha, óńirdegi eldi mekenderdiń 160-ynyń áleýmettik-ekonomıkalyq jaǵdaıy jaqsy bolsa, 470-iniń potentsıaly ortasha. Al bolashaǵy joq aýyldardyń sany 19-ǵa jetken. Bul eldi mekenderde qazir nebary 152 adam turyp jatyr. Esil aýdanyndaǵy Jańalyq, Ortalyq jáne Iversk aýyldarynda turǵyn múlde tirkelmegen.
«Ótken jyldarmen salystyrǵanda potentsıaly joǵary eldi mekenderdiń sanynda ózgeris joq. Áleýmettik-ekonomıkalyq jaǵdaıy ortasha aýyldardyń sany azaıyp, bolashaǵy bulyńǵyr eldi mekender sany artqan. Oǵan eń aldymen halyqtyń kóshýi sebep. Densaýlyq saqtaý, bilim berý nysandarynyń jabylýy, óndiris oryndarynyń bolmaýy da aýyldyń jaǵdaıyna áser etedi», - deıdi SQO Ekonomıka basqarmasynyń basshysy Ársen Qazbekov.
Monıtorıng nátıjesi boıynsha óńirde halyq sany 50-den kem 111 aýyl anyqtaldy. Al damý potentsıaly joǵary aýyldar negizinen Aqjar, Tımırıazev, Ǵ.Músirepov aýdandarynda ornalasqan. Jalpy oblys boıynsha bolashaǵy bar, jaǵdaıy jaqsy 241 eldimeken bar eken. Maqsat - osyndaı potentsıaly joǵary aýyldarǵa halyqty shoǵyrlandyrý.
«Bul eldimekenderde basqa aýyldarmen salystyrǵanda halyq sany kóp jáne mektep, medıtsınalyq pýnkteri bar jáne aýdan ortalyqtarynan 30 km qashyqtyqta ǵana ornalasqan. Bilikti mamandary, turaqty jumys isteıtin bazalyq kásiporyndary bar, halqy tolyqtaı jumyspen qamtylǵan», - deıdi Ársen Qazbekov.
Mamandardyń aıtýynsha, atqarylyp jatqan jumystar nátıjesinde barlyq memlekettik jáne áleýmettik qyzmettermen qamtylǵan, óndiristik, ınjenerlik, áleýmettik ınfraqurylymy damyǵan eldimekenderdi qurýǵa múmkindik týady.
