SQO-da 185 mektep terrorıstik turǵydan osal nysandarǵa jatady

PETROPAVL. QazAqparat – Soltústik Qazaqstan oblysynda bilim berý uıymdarynda qaýipsizdikti qamtamasyz etý úshin tıisti jumys atqarylyp jatyr. 1 qyrkúıekke deıin barlyq nysanǵa mamandandyrylǵan kúzet qoıylyp, kameralar Jedel basqarý ortalyǵyna qosylady, dep habarlaıdy QazAqparat tilshisi.

SQO Bilim basqarmasynyń málimetinshe, óńirde jańa oqý jylynda 465 mektep jumys isteıdi. Budan bólek 24 kolledj esigin aıqara ashady. Qazirgi ýaqytta barlyq bilim berý uıymy 100% beınebaqylaýmen qamtamasyz etilgen. Barlyq nysandarda talaptarǵa sáıkes dabyl túımesi bar.

«Terrorıstik turǵydan osal nysandar qataryna 366-sy jatady. Onyń 1-tobyna – 185 mektep, 1 balabaqsha, 2 kolledj; 2-tobyna – 58 mektep, 15 balabaqsha, 6 kolledj, 1 qosymsha bilim berý uıymy; 3-topqa – 50 mektep, 36 balabaqsha, 10 kolledj, 2 qosymsha bilim berý uıymy jatady.

Talap boıynsha Jedel basqarý ortalyǵyna 2 jáne 3-inshi toptaǵy 178 nysan qosylýy tıis, búginde 165-i nemese 92,7% qosyldy.

1 qyrkúıekke deıin barlyq bilim berý nysany qosylady, tek Aıyrtaý aýdany Imantaý orta mektebiniń tehnıkalyq múmkindigi joq», - deıdi basqarmanyń basshysy Názir Jáshibekov.

Mamandandyrylǵan kúzet ázirge 3-toptyń 37 nysanynda – 37,8% ǵana bar. Jańa oqý jylyna deıin 3-toptyń barlyq memlekettik obektilerinde bolady. Osy maqsatqa 391 mln teńge bólindi.

Kirýdi baqylaý jáne basqarý júıesi 3-topqa jatatyn barlyq memlekettik uıymdarda bolady, ázirge 42,8% ǵana bar. Júzege asyrýǵa 214,2 mln teńge jumsalmaq.

Jalpy bıyl terrorıstik turǵydan osal nysandarda qaýipsizdikti nyǵaıtýǵa 677,2 mln teńge qarastyrylǵan.