SQO-da 18 jastaǵy jigitti kóligimen qaǵyp óltirgen júrgizýshi izdestirilýde
PETROPAVL. QazAqparat – Soltústik Qazaqstan oblysynda 18 jastaǵy jigitti kóligimen qaǵyp, mert qylǵan júrgizýshi izdestirilýde, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, oqıǵa 7 maýsym kúni túngi saǵat bir shamasynda bolǵan. M.Jumabaev aýdany Polýdıno eldi mekeniniń mańynda 2002 jyly týǵan jigitti kólik qaǵyp ketip, júrgizýshi oqıǵa ornynan izin sýytqan. Er bala alǵan jaraqatynan aýdandyq ortalyq aýrýhanada kóz jumdy.
Áleýmettik jelide osy oqıǵaǵa kýá bolǵandar izdestirilip jatyr. Jazbaǵa qaraǵanda jigit eki saǵat jol jıeginde jatyp qalǵan. Ony ótip bara jatqan júrgizýshilerdiń biri baıqaǵan.
«Bul derek «Kólik quralyn basqarǵan tulǵanyń jol qozǵalysy erejesin buzýynan abaısyzda adam ólimine ákelý» baby boıynsha Sotqa deıingi tergep-tekserýdiń biryńǵaı tizilimine engizildi. Sotqa deıingi tergeý barysynda birneshe saraptama taǵaıyndaldy. Bul qylmysty ashýǵa baılanysty jumystar erekshe baqylaýǵa alyndy. Qazirgi ýaqytta jol apatyna kináli júrgizýshini anyqtaý maqsatynda jedel is-sharalar júrgizilip jatyr», - delingen SQO PD baspasóz qyzmetiniń habarlamasynda.
