SQO-da 1,8 mlrd teńge bıýdjet qarajatyn tıimsiz paıdalanýǵa jol berilmedi
Soltústik Qazaqstan oblysy ákimdiginiń qarjy basqarmasy 1 mln 368 myń teńgege jýrnal satyp alýdy josparlaǵan. Sybaılas jemqorlyqqa qarsy qyzmettiń aralasýynan keıin bul maqsatqa nebary 24 myń teńge ǵana jumsady, dep habarlaıdy Kazinform.
QR Sybaılas jemqorlyqqa qarsy is-qımyl agenttiginiń SQO boıynsha departamenti óńirlik kommýnıkatsııalar qyzmetinde jyldy qorytyndylady.
Vedomstvo basshysynyń birinshi orynbasary Aıdos Júnisovtyń aıtýynsha, memlekettik satyp alý saıtyna monıtorıng nátıjesinde josparlanǵan satyp alý baǵasyn asyra baǵalaýdyń 90 faktisi anyqtaldy, bıýdjettiń 1,8 mlrd teńgesin tıimsiz paıdalanýǵa jol berilmedi.
Máselen, Sybaılas jemqorlyqqa qarsy qyzmettiń tekserisinen keıin oblystyń qarjy basqarmasy 1 mln 368 myń teńgege satyp alýdy josparlaǵan jýrnaldyń satyp alý baǵasyn 24 myń teńgege ózgertti.
Sybaılas jemqorlyqqa qarsy volonterlerdiń da úlesi aıtarlyqtaı, olardyń kómegimen 17,4 mln teńge únemdeldi.
Osylaısha memlekettik satyp alýdyń zańsyz júrgizilýine jol berilmedi.
Budan bólek sybaılas jemqorlyqqa qarsy qyzmettiń taldaýy nátıjesinde jalpy somasy 201 mln teńgege qarjylyq zańbuzýshylyqtar anyqtaldy, onyń ishinde memleket pen menshik ıelerine 124 mln teńge qaıtaryldy.
Atap aıtqanda, bilim salasyndaǵy jemqorlyq táýekelderin syrtqy taldaý nátıjesinde 61 mln teńge óteldi.
«Bızneske jol» jobasy aıasynda salyqtyq ákimshilendirý salasynda jiberilgen qateliktiń orny toltyrylyp, 161 kásipkerlik sýbektisi 54 mln teńgeni qaıtaryp aldy.
