SQO-da 18 aýylǵa taza sý berildi

PETROPAVL. QazAqparat – Soltústik Qazaqstan oblysynda búgin 11 myń turǵyny bar 18 aýylǵa taza sý berildi, dep habarlaıdy QazAqparat tilshisi.

SQO ákimi Qumar Aqsaqalov áleýmettik jelidegi paraqshasynda búgin 18 aýylǵa sý berilgenin habarlady.

«Búgin Jambyl, Esil jáne Mamlıýt aýdandarynda 11 myń turǵyny bar 18 aýylǵa sý keldi. Presnov toptyq sý qubyrynyń ekinshi kezeńi iske qosyldy.

8 eldi mekenge sý taratý jelilerin júrgizdik.

Endi kelesi kezeń - Presnov toptyq sý júıesiniń 1-shi kezeńin paıdalanýǵa berý. Oǵan 15 aýyl qosylady, onda 20 myń adam turady. Bul joba 2 kezeńge bólingen: birinshisi boıynsha jyl sońyna deıin 7 aýyl qosylady. Ekinshi kezeńde qalǵan aýyldarǵa 2022 jyldyń aıaǵyna deıin tartylady», - delingen jazbada.

Óńir basshysynyń aıtýynsha, bıyl oblysty sýmen jabdyqtaýǵa qarajat eki ese kóp bólinip, 11,4 mlrd teńgege jetti.

«Bıyl 49 aýyl taza sýmen qamtylmaq. 3 myńnan astam úıge sý tartylady. Jyl sońyna deıin biz aýyl turǵyndarynyń 83,5 %-yn sapaly sýmen qamtamasyz etemiz. Keshendi jospardyń arqasynda 2025 jylǵa deıin 78 aýyl sý jelisine qosylyp, aýyl turǵyndary 100 % sýmen qamtamasyz etiledi», - dep atap ótken Qumar Aqsaqalov.