SQO-da 17 jastaǵy boıjetken joǵalyp ketti
PETROPAVL. QazAqparat - Soltústikqazaqstandyq polıtseıler 17 jastaǵy boıjetkendi izdep jatyr, dep habarlaıdy QazAqparat tilshisi.
Іshki ister departamenti baspasóz qyzmetiniń aqparaty boıynsha, boıjetken 11 qyrkúıekte joǵalyp ketken.
«Esil aýdanynda turatyn 17 jastaǵy stýdent Marına Hrýstalevany izdeý boıynsha jedel is-sharalar júrgizilip jatyr. Organdarǵa qyzdyń Dvınska aýylynda birge turatyn aǵasy shaǵym túsirgen. Ol Marınanyń seısenbi kúni Korneevka aýylynda turatyn qurbysyna ketetinin aıtyp, úıden shyǵyp ketkenin habarlady. Sodan beri onyń qaıda ekeni belgisiz», - dep aqparat berdi baspasóz qyzmeti.
Qyzdyń tanystarynyń aıtýynsha, ony túrli eldi mekenderden kórgen. Tártip saqshylary qyzdyń naqty qaıda ekenin anyqtap jatyr.
Boıjetkenniń shashy ıyqqa deıin keletin ashyq tústi, qoı kózdi. Qoshqyl jasyl tústi kúrtke, jasyl fýtbolka, kók djınsy, qara krossovka kıgen. Polıtseıler onyń qaıda ekenin biletinderden 102 nómirine habarlasýlaryn suraıdy.
