SQO-da 17 mektepte kúrdeli jóndeý qyrkúıekke deıin aıaqtalmaýy múmkin
PETROPAVL. QazAqparat – Soltústik Qazaqstan oblysynda mektepterdiń jańa oqý jylyna ázirligi, olarda jyly dárethanalar men beınebaqylaý júıesiniń bolýy tekserildi, dep habarlaıdy QazAqparat tilshisi.
SQO bilim salasynda sapany qamtamasyz etý departamentiniń málimetinshe, óńirde 462 memlekettik mektep tekserildi. Keı bilim ordalarynyń talapqa saı jumys istemeıtini anyqtaldy. Sonyń biri – mektepterde ystyq tamaqtyń uıymdastyrylmaýy.
«Bul másele negizinen aýyldyń shaǵyn komplektili jáne negizgi mektepterinde bar. Kásipkerler úshin mektep ashanasyn ustaý - tıimsiz. Taǵy bir másele – medıtsınalyq kabınetterdiń bolmaýy. Oǵan medıtsınalyq kadrlardyń jetispeýshiligi sebep. 9 mektepte múldem arnaýly kabınet qarastyrylmasa, 130-ynda qyzmet medıtsınalyq uıymmen kelisimge otyrý arqyly júrgiziledi», - deıdi departament mamandary.
Bıylǵa josparlanǵan kúrdeli jóndeý 17 mektepte merziminen kesh bastalǵan. Saldarynan jumystar jańa oqý jylyna deıin aıaqtalyp úlgermeýi múmkin.
Alaıda barlyq mektep ınternetke qosylǵan, kompıýterler bar. Biraq keıbirinde onyń jyldamdyǵy óte tómen bolǵandyqtan jumys isteý qıyn. Sondaı-aq bilim ordalary 100% ishki jáne syrtqy beınebaqylaý júıesimen qamtylǵan. Alaıda onyń basym bóligi bekitilgen tehnıkalyq talaptarǵa saı emes.
«Oblystaǵy 73 mektep beıimdelgen ǵımaratta ornalasqan. Olardyń materıaldyq-tehnıkalyq jaraqtandyrylýy nashar. Talapqa saı bolýy úshin qosymsha oqý kabınetteri qajet. Dárethanalar barlyq mektepterde bar, keıbirine sý tartylmaǵan, kabınkalar joq jáne jynysyna qaraı bólinbegen. Keshendi monıtorıng qorytyndysy jergilikti atqarýshy organdarǵa jiberildi», - deıdi departament qyzmetkerleri.
