SQO-da 16 jastaǵy jasóspirim kene entsefalıti vırýsyn juqtyryp, em alyp jatyr
PETROPAVL. KAZINFORM – Soltústik Qazaqstan oblysy kópbeıindi balalar aýrýhanasyna ortasha aýyr jaǵdaıda túsken er balanyń beti búginde beri qarady.
Aýrýhananyń ınfektsııalyq bólim meńgerýshisi Elena Koptıaevanyń aıtýynsha, jasóspirim Petropavldan 60 shaqyrym jerdegi aýyldan keldi. Ákesi balanyń qoltyǵynan keneni alyp, birden óltirgen. Al shaqqan ornynda burshaqtaı ǵana lımfatúıini paıda bolǵan. Ýaqyt óte kele balanyń ystyǵy kúrt kóterilip, qaltyraı bastaǵan.
- Kene shaqqanda statsıonarǵa barý óte mańyzdy. Mamandar keneni alyp, tekseriske jiberedi. Osylaısha qansorǵyshta entsefalıt bar ma, joq pa ekenin anyqtap, shaqqan adamǵa ýaqyt ozdyrmaı kómektesýge bolady.
Kene entsefalıti vırýsynyń ınkýbatsııalyq ýaqyty 7 kúnnen bir aıǵa deıin. Osy aralyqta belgileri paıda bolady, dene qyzýy kóteriledi, bas aýyryp, qusýy múmkin.
Bizge túskende balanyń jaǵdaıy ortasha aýyr boldy. Qazir táýir bolyp keledi, - deıdi dáriger.
Mamannyń aıtýynsha, sáýir-mamyr jáne qyrkúıek-qazan aılary kene belsendiligi artyp, kóbeıetin kezi. Osy ýaqytta olar adamǵa jıi shabady.
- Keneniń keı túri entsefalıt vırýsyn taratatyny belgili. Men bul salada kóp jyldan beri eńbek etip kelemin. Soltústik Qazaqstan oblysynda, ásirese balalarda kene entsefalıti vırýsy joq dep keldik. Bizde negizinen kene arqyly taralatyn bórtpe súzek bolatyn. Bul - rıkketsııalar dep atalatyn bakterııalar. Aýrýdyń qozdyrǵyshy adamǵa kóbinese juqtyrǵan keneniń shaǵýy arqyly beriledi.
Onyń negizgi belgilerine keler bolsaq, dene qyzýy 38–40°C deıin kúrt kóteriledi. Denede bórtpe paıda bolady. Mundaı aýrýmen balalar jylda túsedi, bir maýsymda 15-20 balany emdeımiz. Al bıyl kene entsefalıti vırýsymen túsip jatyr, - deıdi Elena Koptıaeva.
Mamannyń aıtýynsha, oblystyq balalar aýrýhanasyna úsh apta buryn kene shaqqan qyz bala jetkizildi. SES-ke tapsyrylǵan qansorǵyshtan qaýipti vırýs anyqtalǵan. Aldyn alý sharalaryn ýaqytynda qoldanǵandyqtan qyz bala aýyrmaı, úıine jiberildi.
SQO Sanıtarııalyq-epıdemıologııalyq baqylaý departamentiniń málimetinshe, sáýir aıynan beri kene shaǵýdyń 529 jaǵdaıy tirkelgen. Onyń ishinde 131-i – 14 jasqa deıingi balalar.
Buǵan deıin Almatyda kene shaqqan jaǵdaıda qaıda júginý qajet ekenin jazǵan edik.
