SQO-da 16 jastaǵy jasóspirim birneshe mýzykalyq aspapta erkin oınap, sýret salady
PETROPAVL. KAZINFORM – Soltústik Qazaqstan oblysy Shal aqyn aýdanynyń 16 jastaǵy turǵyny Nıkıta Skoba birneshe mýzykalyq aspapta erkin oınaıdy. Ónerge qushtar jasóspirimniń repertýarynda qazaqtyń tanymal kúıleri bar. Jasóspirim sýret te salady. Jeti qyoly, bir syrly bozbalany tilshimiz áńgimege tartqan edi.
- Nıkıta, aldymen ózińizdi tanystyryp ketseńiz...
- Men Novopokrovka aýylynda turamyn. Jasym 16-da, bıyl 11-synypqa kóshtim. Sabaqtan bos ýaqytta aınalysatyn hobbılarym jeterlik, ol – mýzyka, sýret salý jáne sport. Voleıbol, fýtbol, basketbol oınaǵan unaıdy. Ónerge súıispenshilik maǵan jaqyndarymnan berilgen. Anam da sýretti jaqsy salady. Atam da kezinde sýretshi bolǵan eken, al ájem mýzykalyq aspaptarda oınap, án aıtqan eken.
Budan bólek bos ýaqytymda balyq aýlaımyn, tamaq pisirgendi jaqsy kóremin. Mekteptegi túrli is-sharalarda júrgizýshi bolǵan unaıdy. Adamdarǵa jaǵymdy emotsııa, jaqsy kóńil-kúı syılaǵandy unatamyn.
- Siz birden birneshe aspapta oınaıdy ekensiz. Mýzykaǵa áýestik qalaı bastaldy?
- Dombyrada, akýstıkalyq gıtarada, erin syrnaıynda jáne syrnaıda, sıntezatorda oınaımyn. Alǵashqy qolǵa ustaǵan mýzykalyq aspabym – gıtara. Birde úıge aǵam gıtarasymen keldi. Men surap alyp, oınap kórmek boldym. Internetti ashyp, eń ońaı áýendi sondaǵy vıdeodan kórip, ózdigimnen oınap kórmek boldym. Meniń qyzyǵýshylyǵymdy kórip, aǵam gıtarasyn bir aıǵa qaldyryp ketti. Osy aralyqta akkordtarmen oınaýdy meńgerip aldym. Odan keıin dombyrany úırendim, sosyn sıntezatordy qolǵa aldym. Eń sońǵy úırengen aspabym – syrnaı.
Alda elektr gıtarada oınaýdy úırenbekpin. Sondaı-aq soqpaly aspap – barabanda oınaýdy meńgerip alǵym keledi. Buǵan deıin úırengen mýzykalyq aspaptarda oınaýdy da jetildire túsý qajet.
Dombyra aspabyn úırenýime mýzyka pániniń muǵalimi Asylbek Ǵarıfollauly uıytqy boldy. Men mektep prezıdenti boldym. Birde tereze jaqtaýynda turǵan dombyrany kórip, bir shegimen ózim biletin áýendi salyp kórdim, dybystalýy unady. Al bir aptadan keıin dombyra úıirmesine keldim. Bastapqyda saýsaqtarymnyń ıkemi kelmedi, qaǵysyn túsinbedim. Biraq ustazym jalyqpaı túsindirip, jol kórsetip jiberdi. Kúılerdi tyńdaýǵa keńes berdi. Sosyn ınternet arqyly úırendim. Repertýardy muǵalimim tańdap beredi. Qazir men «Adaı», «Balbyraýyn», «Erke sylqym», «Álqıssa», «Keroǵly», «Kóńil tolqyny», «Ata tolǵaý», «Áke tolǵaý» sekildi kúılerdi bilemin. Jalpy, qazaq mýzykasynda Nurǵısa Tilendıevti pir tutamyn.
- Sahnada óner kórsetip júrsiz be? Dombyrada oınaǵanda kórermen sizdi qalaı qabyldaıdy?
- Iıa, sahnaǵa qazir jıi shyǵamyn. 2022 jyly dombyra úırenýdi bastasam, shamamen bir jyldan keıin kórermen aldynda alǵashqy kúıimdi oryndadym. Petropavlda baıqaý ótti, kelgender maǵan túregep qol soǵyp, jaqsy qoldaý kórsetti. Sol joly birinshi oryndy jeńip alyp, syılyqqa qysqa tolqyndy peshti syıǵa berdi. Óte keremet áser alyp, úıge qýanyp keldim. Keıin Naýryz meıramynda kúı tarttym, maǵan apaılardyń biri kelip syılyǵyn berdi.
- Bolashaqta ómirińizdi mýzykamen baılanystyrýdy josparlaısyz ba?
- Mamandyǵym shyǵarmashylyqpen baılanysty bolady. Men qazir sýret salýǵa basymdyqty berip júrmin. Syzý baǵytyn tańdaǵym keledi.
- Sýret sala bastaǵanyńyzǵa kóp boldy ma? Sizge qaısy - adamdardy, tabıǵatty beıneleý nemese abstraktsııa kóbirek unaıdy?
- Balabaqshadan maǵan sýret salǵan unaıdy. Qolyma túsken qaǵazǵa sýret salyp otyratynmyn.
Al 12-13 jasymnan bastap sýret salý ónerin kásibı túrde meńgere bastadym. Ustazym Lıýdmıla Nıkolaevna baǵyt-baǵdar berdi. Salǵan sýretterimdi kóbine áleýmettik jelidegi paraqshama jarııalaımyn. Kóbine tabıǵatty beıneleımin. Sondaı-aq fıgýralardy salǵan unaıdy. Keıde unaǵan ártisterimniń portretterin de salamyn.
Jumys barysynda túrli-tústi qaryndashtardy, markerlerdi, akvarel, gýash boıaýdy qoldanamyn. Maıly boıaýmen, akrılmen salyp kórdim. Sýret salǵanda da túrli tehnıkany meńgerip, qoldanýǵa tyrysamyn. Qazir ınternette túrli sheberlik sabaqtary kóp, ynta bolsa bárin úırenýge bolady.
- Sizdiń shyǵarmashylyǵyńyzda qaısysy basym: ıdeıa, kóńil-kúı, baqylaý nemese qııal?
- Kóńil-kúı der edim. Eger kóńil-kúı bolmasa, túkke zaýqyń soqpaıdy. Sondaı-aq sýretshige qajet basty qasıet – baıqampazdyq. Men ǵımarattardyń sáýletin qaraǵandy jaqsy kóremin. Sol úshin Sankt-Peterbýrg qalasy unaıdy. Al kóńil-kúı bolsa shabyt ta keledi, qııalǵa qanat bitiredi.
Kópshilik mán bermeıtin zattardy kóre bilý, mysaly men, erekshe ǵımarattardy sýretke túsirip alýǵa tyrysamyn. Sondaı-aq ádemi sátter, kúnniń batqan shaǵy, aranyń gúlge qonýy, t.b. nazardan tys qalmaıdy. Erekshe rakýrstardy baıqap, fotoǵa túsirip júremin.
- Ónerdiń san qyryn meńgerýińiz – eńbekpen jetken jetistik pe, álde Jaratqan bergen týma qasıet pe?
- Ekeýi de bar shyǵar. Maǵan jańa nárseni úırengen unaıdy. Biraq, orta jolda qaldyrmaı ony shegine jetkizý kerek. Al bul – tártip pen eńbekti qajet etedi. Adamda tek darynnyń bolýy jetkiliksiz, eńbektenbese, ony jetildirmese, bári beker. Sondaı-aq, adamdy daryndy etetin qorshaǵan ortasy der edim. Meniń dombyradan dáris beretin ustazym nemese sýret salýdyń qyr-syrymen bólisken muǵalimim meniń qazirgi jetistikke jetýime sebepker boldy. Sondaı-aq, ata-anam, ata-ájelerim – maǵan senim bildirip, únemi qoldap otyrady.
- Aldaǵy birneshe jylǵa qandaı arman-maqsattaryńyz bar?
- Mektepti jaqsy aıaqtap, qalaǵan mamandyǵyma túsý. Bolashaq mamandyǵym sáýlet ónerimen baılanysty bolady dep oılaımyn.
Buǵan deıin qazaqtyń qara dombyrasyn jetildirip, onyń zamanaýı úlgisin jasap shyqqan Petropavl turǵyny Bolat Qanafın týraly jazǵan edik.
