SQO-da 16 jasar jasóspirim Esil ózenine batyp ketti
PETROPAVL. KAZINFORM — Er bala arnaıy jaraqtandyrylmaǵan jerge baryp, sýǵa túsken.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 22 maýsym kúni keshki ýaqytta Ǵabıt Músirepov atyndaǵy aýdanda boldy. Esil ózeninde, Muqyr aýylynan shamamen 5 shaqyrym jerde sýǵa batqan jasóspirimniń denesi tabyldy.
2009 jyly týǵan jasóspirimniń máıitin SQO TJD jedel-qutqarý jasaǵynyń qyzmetkerleri sýdan alyp shyqty.
Qutqarýshylar turǵyndardy qaýipsizdik talaptaryn qatań saqtaýǵa shaqyrady. Mamandardyń aıtýynsha, sýǵa tek arnaıy jabdyqtalǵan jáne qutqarýshylar kezekshilik etetin resmı demalys oryndarynda ǵana túsken jón.
Al shomylýǵa tyıym salynǵan oryndarda sýǵa túsken azamattarǵa ákimshilik jaýapkershilik qarastyrylǵan. Mundaı quqyq buzýshylyq úshin 7 AEK mólsherinde, ıaǵnı 30 myń teńgeden astam aıyppul salynady.
SQO-da jazǵy shomylý maýsymy bastalǵaly bul sýǵa batyp ketken úshinshi adam.
Buǵan deıin Aqjar aýdanyndaǵy Shat ózeninen jergilikti turǵyndar 64 jastaǵy er adamnyń denesin taýyp, sýdan shyǵaryp alǵanyn jazdyq.
Al Petropavldaǵy Pestroe kólinde er adam sýǵa tunshyǵyp, kóz jumdy.
