SQO-da 1,6 myńǵa jýyq adam Teplıchnoe bógetin nyǵaıtyp jatyr

ASTANA. KAZINFORM – Óńirde bógetti nyǵaıtý jumystary úsh kúnnen beri táýlik boıy júrgizilip jatyr, dep habarlaıdy SQO ákimdiginiń baspasóz qyzmeti.

SQO ákimi Teplıchnoe bógetin nyǵaıtý jumystaryn táýlik boıy baqylaýǵa aldy.

— Úsh kúnnen beri táýlik boıy jumys istep jatyrmyz. Teplıchnyıdaǵy qorǵanys bógetin nyǵaıtý barysy jeke baqylaýymda. Keshe 30 myń qadam júrip óttim, búgin de osynsha qashyqtyqty eńserdim, — dep jazdy óńir basshysy Ǵaýez Nurmuhambetov áleýmettik jelide.

Bógette qajetti tehnıka bar, shatyrlar tigilgen, tamaqtandyrý uıymdastyrylǵan. Jumysqa 1,6 myńǵa jýyq adam tartylǵan — bul kásiporyndar men uıymdardyń qyzmetkerleri, memlekettik qyzmetshiler, áskerıler jáne qutqarýshylar. Aýdandar da kómek kórsetip keledi. Kórshiles óńirlerden qutqarýshylar da keldi. 90 myń qap tóseldi. Sý toltyrylǵan bóget ornatyldy. Bóget astynan sý aǵýyn boldyrmaý úshin súńgýirler de tartylýda. Oblys ákimi halyqpen kezdesip, barlyq qıyndyqqa qaramastan táýlik boıy eńbek etip júrgen azamattarǵa shynaıy alǵysyn bildirdi.

— Basty mindet — eldi mekenniń tolyq qaýipsizdigin qamtamasyz etý. Barlyq qaýip joıylǵanǵa deıin jumysty jalǵastyra beremiz, — dedi oblys ákimi.

Al TJM málimetine sáıkes Soltústik Qazaqstan oblysy Teplıchnoe aýylynda sý tasqynyna qarsy is-sharalar tórtinshi kúnnen beri úzilissiz, táýlik boıy júrgizilip keledi. Barlyq kúsh bógetterdi nyǵaıtýǵa jáne yqtımal zardaptardy boldyrmaýǵa jumyrylǵan.

Buǵan deıin Esil ózeniniń tasýyna baılanysty Soltústik Qazaqstan oblysy Teplıchnoe eldi mekeninen turǵyndar qaýipsiz jerge shyǵaryla bastaǵany málim boldy.