SQO-da 16 ınvestıtsııalyq joba iske asady
PETROPAVL. QazAqparat - 2020 jylǵa deıin Soltústik Qazaqstan oblysynda 1 mlrd teńgeden asatyn somada sút óndirý boıynsha 16 ınvestıtsııalyq jobany júzege asyrý jáne jańǵyrtý josparlanyp otyr, dep habarlaıdy «QazAqparat» HAA tilshisi.
Jyl saıyn oblysta 500 myń tonnadan joǵary sút ónidiriledi. Sońǵy úsh jylda onyń kólemi 50 myń tonnaǵa artty. Onyń ústine, óńirde súttiń 74%-yn jeke qosalqy sharýashylyqtar beredi. Aýyl turǵyndary óńdeýshi kásiporyndarǵa 125 myń tonnadan astam ónim jiberip otyr.
Oblystyq aýyl sharýashylyǵy basqarmasynyń basshysy Qaırat Omarovtyń aıtýynsha, 475 eldi mekenderden sút satyp alý uıymdastyrylǵan. Súttiń lıtrin ortasha eseppen 75 teńgege satyp alady. Sútti qabyldap, 37 aýyl sharýashylyǵy kooperatıvteriniń óńdeýshi kásiporyndaryna ótkizedi.
«Kooperavtıterdiń artyqshylyqtary da bar. Birinshiden olar maılylyǵyn, qoıýlylyǵyn, tazalylyǵyn jáne quramynda sýdyń joqtyǵyn saraptamadan ótkizý arqyly satyp alynǵan súttiń sapasyn baqylaıdy, bastapqy súzgiden ótkizip, 4oS deıin salqyndatady. Satyp alynǵan sút salqyndatqysh tankerlerde jınalyp, odan keıin óńdeýshi kásiporyndarǵa jiberiledi», - deıdi Qaırat Omarov.
Óńirde jylyna 290 myń tonnadan astam shıkizat óńdeýge qabiletti 15 sút óńdeýshi kásiporyn jumys isteıdi. Byltyrǵy jyly 255 myń tonna shıki ónim óńdeldi. Soltústikqazaqstandyq sút óńdeýshi kásiporyndardyń 87%-y jumys istep tur.
