SQO-da 150 myń adamnyń járdemaqysy men zeınetaqysy ósti

PETROPAVL. KAZINFORM — Soltústik Qazaqstan oblysynda bıyl zeınetaqy men járdemaqy tóleýge bıýdjetten 232 mlrd teńgege jýyq qarajat bólinbek.

SQO jumyspen qamtýdy úılestirý jáne áleýmettik baǵdarlamalar basqarmasynyń málimetinshe, óńirde byltyr jasyna baılanysty tólenetin zeınetaqynyń ortasha mólsheri 85 myń teńge, bazalyq zeınetaqy — 43 myń teńge bolǵan. Bıyl barlyq memlekettik járdemaqy men bazalyq zeınetaqy 6,5% ósti, al yntymaqty zeınetaqy 8,5% artty.

— Byltyr oblysta múgedektiági bar jáne asyraýshysynan aıyrylǵandarǵa 17,6 mlrd teńge jáne kópbalaly otbasylarǵa 3,6 mlrd teńge mólsherinde járdemaqy tólendi. Bıyl halyq aldyndaǵy áleýmettik mindettemelerge 231,9 mlrd teńge bólý josparlanǵan, kómek alýshylar sany — 149 498 adam, olar zeınetkerler, járdemaqy jáne ataýly áleýmettik kómek alýshylar, — deıdi basqarma basshysy Rınat Eljasov.

Byltyr SQO-da 5,2 myń azamatqa 545 mln teńge ataýly áleýmettik kómek kórsetildi. Qosymsha 1,5 myń balaǵa 53 mln teńge tólengen. Bıyl bul maqsatqa 659 mln teńge qarastyrylǵan.

— Budan basqa, 29 myńnan astam muqtaj adamǵa jalpy somasy 4,7 mlrd teńgege áleýmettik kómek kórsetildi, onyń ishinde sý tasqynynan zardap shekkenderge 100 AEK mólsherinde birjolǵy kómek kórsetildi, ıaǵnı 9,3 myń adamǵa 3,4 mlrd teńge berildi, — deıdi Rınat Eljasov.

Múgedektigi bar azamattardy qoldaýǵa 2,2 mlrd teńge bólindi. Bul qarajatqa múmkindigi shekteýli jandarǵa arnaıy quraldar alynyp, áleýmettik qyzmet kórsetiledi. Óńirde qazirgi ýaqytta 24,2 myń múgedektigi bar adam, sonyń ishinde 2,4 myńǵa jýyq bala bar.

Buǵan deıin Petropavlda tasqynnan zardap shekkenderdiń bir bóligi áli kúnge baspanasyz júrgenin jazǵan edik.