SQO-da 150 eldi meken úsh kúnnen beri jaryqsyz otyr
Soltústik Qazaqstan oblysynda on aýdannyń 150 eldi mekeni úsh táýlikten beri jaryqsyz otyr, dep habarlaıdy Kazinform.
SQO Tótenshe jaǵdaılar departamentiniń málimetinshe, óńirde áli kúnge deıin 18 qarasha kúni bolǵan borannyń saldarymen kúresip jatyr.
«Sol kúni SQO boıynsha respýblıkalyq joldarda 9 ýchaske jabyldy. Sondaı-aq aýdandyq bólimsheler, jolaýshylar tasymaly jáne avtokólik joldary basqarmasy óz kúshimen oblystyq, aýdandyq mańyzy bar joldardy japty.
Shal aqyn aýdanynda Gazel kóligi joldan shyǵyp ketti. Sol kúni 60-tan astam adamdy úsh aýdandaǵy 4 jylytý pýnktine ornalastyrdyq», - deıdi departamenttiń bólim bastyǵy Sáken Aǵzamov.
Borandy kúni malyn izdeýge shyqqan úsh adam joldan adasyp ketken. Olardyń bári aman-esen tabyldy.
«18 qarasha kúni 11 aýdanda elektr jelisi isten shyqty. Saldarynan 217 eldi mekenniń 33 myńnan astam abonenti jaryqsyz qaldy. Búginde jóndeý-qalpyna keltirý jumystary júrip jatyr. Qazirgi ýaqytta 21 myń adam turatyn 150 eldi mekende jaryq joq», - deıdi Sáken Aǵzamov.
Esterińizge salaıyq, SQO-da bir táýlikti aıdyń normasyndaǵy qar jaýǵanyn aıtqan edik.
Jabysqaq qar men qatty jel saldarynan elektr taratý jelilerine muz qatyp, úzildi. Qazir apat ornynda elektrmen jabdyqtaýshy kompanııanyń brıgadalary jumys istep jatyr.
