SQO-da 150 dárigerdiń orny bos tur

Qozybaev ýnıversıteti baspasóz qyzmetiniń málimetinshe, qazir óńirde shamamen 150 dáriger jetispeıdi. Osyǵan baılanysty sońǵy ýaqytta oblysta medıtsınalyq ýnıversıtet ashý týraly bastama jıi kóterilip júr. Alaıda salaǵa qajetti mamandar daıarlaý isi óńirde buǵan deıin de júrgizilip kelgen.

Jergilikti joǵary oqý ornynda 2018 jyly medıtsınalyq fakýltet ashyldy. Biraq lıtsenzııalyq talaptardyń ózgerýine baılanysty sońǵy úsh jylda talapkerlerdi qabyldaý toqtatyldy. Búginde qajetti lıtsenzııalar jańartylyp, jańa oqý jylyna stýdentterdi qaıta qabyldaý josparlanyp otyr.

Ýnıversıtettiń Basqarma tóraǵasy Erbol Isaqaevtyń aıtýynsha, oblystyq densaýlyq saqtaý basqarmasymen memorandým jasalyp, 15 klınıkalyq tájirıbe bazasymen qamtamasyz etilgen. Sondaı-aq medıtsınalyq fakýltet zamanaýı materıaldyq-tehnıkalyq bazamen qamtamasyz etilgen. Stýdentterdiń tájirıbelik daıyndyǵyn kúsheıtý maqsatynda UniMed stýdenttik emhanasy qaıta qurylyp, medıtsınalyq qyzmet kórsetýge beıimdelý ústinde. Bul emhana da bolashaq dárigerler men ınternder úshin qosymsha tájirıbe alańyna aınalady.

Qozybaev ýnıversıtetinde bakalavrıat boıynsha «Jalpy medıtsına», «Farmatsııa» jáne «Medıtsına» bilim berý baǵdarlamalary bar. Magıstratýra men rezıdentýra da qarastyrylǵan. Kadr tapshylyǵyn eskere otyryp, bıyldan «Stomatologııa» baǵytyn ashý josparlanyp otyr. Bul bakalavrıat pen ınternatýra deńgeılerin qamtıdy. Jańa oqý jylynda Úndistan, Qytaı, Sırııa, Iordanııa, Bangladesh, Ózbekstan jáne Reseıden sheteldik stýdentterdi qabyldaý kózdelgen.
Bıyl oqý ornyn 98 stýdent támamdaıdy. Onyń 44-i beıindik ınternatýra túlekteri bolsa, 6 stýdent «Farmatsııa» baǵyty boıynsha bitiredi. Qalǵandary «Medıtsına» baǵdarlamasynyń túlekteri. Ýnıversıtet málimetinshe, barlyq bitirýshiler bolashaq jumys oryndarymen qamtylǵan.

Buǵan deıin eki jylda dáriger tapshylyǵy 20% qysqarǵanyn jazǵan edik.