SQO-da 15 tonna júgi bar fýra aýdaryldy
PETROPAVL. QazAqparat – Soltústik Qazaqstan oblysynda 15 tonna tuqym tıelgen júk kóligi joldan shyǵyp ketip, bir jaǵyna aýdaryldy, - dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Esil aýdany Chırıkovka aýylynyń mańynda «Volvo» kóliginiń júrgizýshisine kómek qajet boldy.
Ol Tımırıazev eldi mekenine 15 tonna tuqym apara jatqan. Fýra joldan shyǵyp ketip, bir jaq qyrynan turyp qalǵan. Túnde joldy qar alyp qalǵan soń, oǵan eshkim jete almady.
19 aqpan tańǵy saǵat 4.00 shamasynda «Qazavtojol» JShS tehnıkasy joldy tazalaýǵa shyqty. Polıtseıler «Volvo» kóliginiń júrgizýshisine kómek kórsetý úshin «Esil Agrofırma» JShS dırektory Serik Jenapınovke júgindi.
JShS basshysy tuqym artýǵa «Monitau» jáne «K-700» tehnıkalaryn berip jáne júrgizýshige ystyq tamaq salyp jibergen. Tártip saqshylary tuqymdy sharýashylyq bergen júk kóligine tıeýge kómektesip, keıin «Volvo» fýrasyn jolǵa shyǵardy.
Uqsas oqıǵa Petropavlda da boldy. Qala syrtyndaǵy aınalma jolda «MAN» júk kóligi jıekke túsip ketken. Oǵan qalalyq patrýldik polıtseıler men «Qazavtojol» JShS kómekke keldi.
18 aqpanda SQO-da Shal aqyn aýdanynyń turǵyndary kólikpen Petropavldan jolǵa shyqqan: birin úıinde balalary, ekinshisin naýqas anasy kútip otyrǵan. Aýa raıynyń qolaısyzdyǵynan, aınalany kórý shektelgendikten Esil aýdanynyń Birlik aýylynyń tusynda kólik joldan shyǵyp ketken. Áıelder 911 nómirine qońyraý shalǵan, alaıda sol kúni qutqarýshylar men polıtseılerdiń kúshteri boranda adasyp ketken Birlik aýylynyń eki balasyn izdeýge jumyldyrylǵan edi.
Jolaýshylarǵa trassada kezekshilikte júrgen patrýldik polıtsııa batalonynyń ekıpajy kómekke keldi. Jolaı kezdesken júk kóliginiń júrgizýshileri kıývetten kólikti alyp shyqty. Patrýldik polıtsııa qyzmetkerleri oqıǵa qaıtalanbaýy úshin olardy aýdan ortalyǵy Sergeevkaǵa deıin bastap, jetkizip saldy.
