SQO-da 15 saýyqtyrý lageriniń jartysy jumysyn bastaı almaı otyr
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, bıyl óńirdegi 15 saýyqtyrý lageri 7240 balany demalyspen qamtýdy josparlaǵan. Alaıda bul lagerlerdiń tek jeteýi ǵana qazir sanıtarııalyq-epıdemıologııalyq qorytyndyny alyp, óz jumystaryn bastady. Olardyń ekeýi Petropavl mańynda, qalǵandary aýdandarda ornalasqan.
Qujattaryn saılap, tıisti ruqsatty alǵan lagerlerde alǵashqy maýsym osy aıdyń 17-20 kúnderi bastaldy. Balalar 10 kúnnen dem alady.
«Bıyl 15 lagerdiń tórteýi: Mamlıýt aýdanyndaǵy «Iskra», Jambyl aýdanyndaǵy «Lesnaıa polıana», Qyzyljar aýdanyndaǵy «Zolotaıa osen» jáne Ǵ.Músirepov atyndaǵy aýdandaǵy «Solnyshko» lagerleri múldem jumys istemeıdi. Bul lagerlerde menshik ıeleri áli anyqtalmaǵan, senimgerlik basqarýǵa berilmegen. Al «Lesnaıa polıana» saýyqtyrý lagerinde sýmen jabdyqtaý máselesi sheshilmegen. Uńǵymadan alynatyn sý kórsetkishterge sáıkes kelmeıdi jáne ony tek tehnıkalyq maqsattarǵa ǵana qoldanýǵa bolady», - deıdi SQO sanıtarııalyq-epıdemıologııalyq baqylaý departamenti bóliminiń basshysy Gúlnar Seıitova.
Balalar men jasóspirimderdiń qaýipsiz demalysyn uıymdastyrý úshin mindetti túrde normatıvtik qujattarǵa sáıkes talaptardy oryndaý qajet. Ol úshin balalardyń demalysyn uıymdastyratyn zańdy jáne jeke tulǵalar sanıtarııalyq-epıdemıologııalyq qorytyndyny alý kerek.
«Apattyq jaǵdaıda turǵan ǵımarattardaǵy lagerlerdiń jumys isteýine jol berilmeıdi. Aýmaǵy qorshalǵan bolýy tıis. Nysandarda ortalyqtandyrylǵan aýyz sý men ystyq sý bolýy kerek. Ol bolmaǵan jaǵdaıda sý jylytqyshtar ornatylady. Ortalyqtandyrylǵan sý jelisine qosylmaǵan jaǵdaıda jergilikti sý kózin paıdalanýǵa bolady. Alaıda ystyq jáne sýyq sý ǵımarattyń ishine kirgizilip, qoljetimdi bolýy tıis», - deıdi Gúlnar Seıitova.