SQO-da 15 myńǵa jýyq adam tumaýǵa qarsy ekpe aldy
PETROPAVL. QazAqparat – Soltústik Qazaqstan oblysynda jedel respıratorlyq-vırýstyq ınfektsııany juqtyrǵandar sany artyp keledi. Qyrkúıekte 4010 adam aýyrsa, sonyń 1096-sy ótken aptada tirkelgen, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamentiniń ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Merýert Atambaevanyń aıtýynsha, 1 qazan elimizde tumaý men vırýstyq ınfektsııalardyń epıdemııalyq maýsymy resmı túrde bastaldy. Óńirde aýyrǵandar sany artyp keledi, alaıda baqylanatyn deńgeıden asqan joq. Ázirge tumaýdy juqtyrǵandar anyqtalǵan joq. Al jedel respıratorlyq-vırýstyq ınfektsııany qyrkúıek aıynda 4010 adam juqtyrsa, sonyń 1096-sy ótken aptada tirkelgen.
«Byltyrǵy maýsymda JRVI-di juqtyrýdyń 38 508 jaǵdaıy tirkeldi. Olardyń 1702-sin aýrýhanaǵa jatqyzýǵa týra keldi. Onyń 97-si júkti áıel, 388-i bir jasqa deıingi bala. Aýyrǵandardyń 686-synyń ókpesi qabynǵan. Onyń aldyndaǵy maýsymda 44 514 adam aýyrdy», - deıdi MerýertAtambaeva.
Bıyl da SQO-ǵa tumaýǵa qarsy 60 myń doza preparat alyndy. Reseılik «Grıppol plıýs» qaýip-qater tobyna jatatyndarǵa tegin egiledi. Osy kúnge deıin oblys turǵyndarynyń 2,7 %-y – 14 951 adam ekpe aldy. Onyń ishinde 1,6 myńǵa jýyq oqýshy, 4 myńǵa jýyq medqyzmetker, 53 júkti áıel bar.
«Maýsymdyq tumaýda ádette birden dene qyzýy kóterilip, qurǵaq jótel paıda bolady, bas aýyryp, dene syrqyrap aýyrady. Tamaq qyzaryp, murynnan sý ketýi múmkin. Jótel eki aptaǵa deıin sozylýy múmkin. Kópshilik bir aptaǵa deıin aýyrady. Al qaýip-qater tobyna jatatyndarda aýrý asqynyp, sońy ólimge aparýy múmkin. Jylda álem boıynsha tumaý epıdemııasynan 290-650 myń adam qaıtys bolady», - deıdi sanıtar dápiger.
Mamannyń aıtýynsha, aýrýmen kúrestiń tıimdi joly – vaktsına alý. Sondaı-aq, durys maska taǵý, áleýmettik ara qashyqtyqty saqtaý, kisi kóp júretin jerlerge barmaý, qoldy sabyndap jıi jýyp otyrý. Immýnıtetti kóterý úshin dárimender ishý, dalada kóbirek serýendeý, durys uıyqtaý da ınfektsııamen kúrestiń birden-bir joly bolmaq.
