SQO-da 15 aýylǵa sý kirýi múmkin: Ákimdikter daıyndyq júrgizýde
PETROPAVL. QazAqparat – Soltústik Qazaqstan oblysy Qyzyljar aýdanyndaǵy 12 eldi meken turǵyny tasyǵan Esil ózeninen zardap shegýi múmkin. Qazir bul aýyldardyń mańynda bógetter bekitilip jatyr, dep habarlaıdy QazAqparat tilshisi.
Qyzyljar aýdany Teplıchnoe eldi mekeniniń mańynda sý tasqynyna daıyndyq júrgizilip jatyr. Jumys naýryz aıynyń sońynda bastaldy. Bul eldi mekende 300-ge jýyq úı sý kirýi yqtımal qaýipti aımaqta ornalasqan.
«Qazirgi ýaqytta jeke quramnan 40 adam jumysqa jumyldyrylǵan. Ulttyq ulan, jergilikti atqarýshy bılik ókilderi de atsalysyp jatyr. Sýdyń jolyn bógeý úshin aýyr tehnıka qoldanyp jatyrmyz.
Tasqyn sý bir aptada keledi dep boljanǵan. Onyń qandaı deńgeıge kóteriletini ázirge belgisiz. Soǵan qaramastan biz aldyn alý úshin bógetti barynsha kóterip jatyrmyz. Mindet – sý kelgenshe jolyn jabý. Aldaǵy úsh kúnde jumysty bitiremiz», - deıdi Qyzyljar aýdany ákiminiń azamattyq qorǵanys boıynsha bas ınspektory Ahmethan Tobylbaev.
Mamannyń aıtýynsha, budan basqa ár úıge kirip, turǵyndarmen túsindirý jumystary júrgiziledi.
«Tasqyn sý kelgende ne isteý kerek, qaıda habarlasý kerek – bárin aıtyp jatyrmyz. Arnaıy býkletter ázirledik. Aýyldyq okrýg ákimderimen halyqty evakýatsııalaý josparyn qarap, bekittik. Qazir aýdan aýmaǵynda 5 myń adam sııatyn 13 evakýatsııalyq beket bar. Sondaı-aq 15 táýlikke jetetin azyq-túlik qoryn jasadyq», - deıdi Ahmethan Tobylbaev.
Qyzyljar aýdanynda tasyǵan ózen sýynyń jolynda turǵan 12 eldi meken bar. Taǵy úsh aýyl turǵyny erigen qar sýynan zardap shegýi múmkin.
«Dál osyndaı úımeler qazir Semıpalatnoe eldi mekeniniń mańynda, Beskól aýylynda jasalyp jatyr. Jospar boıynsha Prıbrejnoe eldi mekeninde de turǵyzylady. Sokolovka eldi mekeninde de sý jolyn bógeý jumystary júrgizilýde», - deıdi Ahmethan Tobylbaev.
