SQO-da 144 sharýashylyq jataǵan ýkekireniń jaıylýyna jol bergen

PETROPAVL. KAZINFORM – Soltústik Qazaqstan oblysynyń 12 aýdanynda jataǵan ýkekirege qatysty karantın jarııalanǵan. 144 sharýashylyqtyń 133,5 myń ga alqabyna aramshóp jaıylǵan. 

Mamandardyń aıtýynsha, jataǵan ýkekire - eń zııandy jáne ońaılyqpen joıylmaıtyn, barlyq daqyldyń shyǵymdylyǵyn jáne jemshóp sapasyn tómendetetin aramshóp. Ol basqa ósimdikterge qaraǵanda topyraqtan 2-5 ese kóp qorektik zattar men ylǵaldy sińiredi. Tamyry 3 jyl, tuqymy 5-6 jyl topyraqta saqtalady.

«2006 jyly 2 myń ga alqapta jataǵan ýkekirege qarsy óńdeý júrgizilse, qazir ol birshama qysqarǵan. Bıyl 203 ga aramshópke qarsy hımııalyq óńdeý qoldanylady. 
Oqshaýlaý jáne joıýǵa qatysty uıǵarymdardy oryndamaǵany úshin 1 myń 276 teńge somasyna tórt aıyppul salyndy.
Qyzmeti karantınge jatqyzylǵan ónimdi óndirýmen baılanysty egistikterdi júıeli zertteýdi qamtamasyz etpegeni úshin 15 sharýashylyqqa 1 mln 828 myń teńge somasyna aıyppul salyndy», - deıdi SQO aýmaqtyq ınspektsııasy basshysynyń orynbasary Marat Shakımov.

Sondaı-aq, Reseıden ákelý kezinde 69 derek anyqtaldy, aıyppul somasy 7,5 mln teńge.

Sharýashylyqtarǵa jataǵan ýkekire boıynsha karantındik nysandardyń oshaqtaryn oqshaýlaý jáne joıý jóninde barlyǵy 175 uıǵarym berildi.