SQO-da 143 mektep qalypty jaǵdaıda bilim berýdi jalǵastyrady
PETROPAVL. QazAqparat – Soltústik Qazaqstan oblysynda shalǵaı eldi mekenderdegi mektepter shtattyq rejımde jumysyn jalǵastyrady, dep habarlaıdy QazAqparat tilshisi.
SQO Bilim basqarmasynyń málimetinshe, qalypty jaǵdaıda jumys isteıtin mektepterde 5 pen 80 balaǵa deıin oqıdy. Bul bilim ordalary sondaı-aq oblys, aýdan ortalyqtarynan jáne kúre joldardan alys ornalasqandyqtan tańdalyp alyndy.
«Oblysta oqýshy sany az 261 mektep bar. Sonyń 143-i qalypty jaǵdaıda jumys isteıdi. Bul mektepterde 5 myńǵa jýyq bala bilim alyp jatyr. 6 sáýirden oqýshylar bala sanyna qaramastan eki aýysym boıynsha oqıtyn bolady. Mekemelerde saqtyq sharalary kúsheıtiledi. Tańerteń barlyǵy mindetti túrde medıtsınalyq tekserýden ótedi. Kúndelikti sanıtarlyq-dezınfektsııalyq is-sharalar júrgiziledi», - deıdi SQO Bilim basqarmasynyń jetekshisi Gúlmıra Kárimova.
Oblystaǵy 3 arnaıy mektep-ınternat pen jetim jáne ata-ananyń qamqorlyǵynsyz qalǵan balalarǵa arnalǵan 6 mekemede de qashyqtan bilim berý júzege asyrylady.
Mamlıýt sanatorlyq mektep-ınternatynda, Lomonosov jáne Chkalov mektep-ınternattarynda, jetim jáne ata-ananyń qamqorlyǵynsyz qalǵan balalarǵa arnalǵan Shóptikól, Sokolov arnaıy mektep-ınternattarynda oqý protsesi ádettegideı júrgiziledi. Biraq kelip-ketetin qyzmetkerler men pedagogtar medıtsınalyq baqylaýǵa alynyp, ata-analarǵa jáne bógde adamdarǵa mekemege kirýge tyıym salynady.
Tehnıkalyq qoldaý kórsetý maqsatynda búgin barlyq aýdanda front-keńseler, Petropavlda call-ortalyq jumysyn bastady.
Al qashyqtan bilim berý kezeńinde mektep ustazdarynyń eńbekaqysy tolyq kólemde saqtalmaq.
Buǵan deıin SQO-da oqýshylardy qashyqtan oqytýdy qamtamasyz etý úshin bıýdjetten qosymsha 116 mln teńge bólingenin aıtqan edik.
