SQO-da 1400-den astam kásipker ekologııalyq tólemdi zańsyz tólegen
ASTANA. KAZI(NFORM - Tabıǵat paıdalaný salasyndaǵy zańdylyqtyń jaı-kúıine júrgizilgen taldaý barysynda qorshaǵan ortaǵa teris áser etkeni úshin bıýdjetke tólemderdi negizsiz engizý faktileri anyqtaldy, dep habarlaıdy Soltústik Qazaqstan oblystyq prokýratýrasynyń baspasóz qyzmeti.
Baspasóz qyzmetiniń málimetterine qaraǵanda, «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasy Kodeksiniń 637-baby talaptaryn buza otyryp, 2024–2025 jyldary oblystyń 1,4 myńnan astam tabıǵat paıdalanýshysy qorshaǵan ortaǵa teris áser etkeni úshin jalpy somasy 149 mln teńge kóleminde tólem jasaǵan. Alaıda qoldanystaǵy zańnama talaptaryna sáıkes olar atalǵan mindetten bosatylǵan.
Prokýrorlyq qadaǵalaý aktisi boıynsha oblystyń Memlekettik kirister departamenti sýbektilerdiń bergen ótinishteri negizinde 6,5 mln teńge somasyndaǵy qarajatty esepke jatqyzýdy jáne qaıtarýdy qamtamasyz etti. Qalǵan qarajatty qaıtarý jumystary júrip jatyr.
-Anyqtalǵan zańbuzýshylyqtardy tolyq joıý máselesi oblys prokýratýrasynyń baqylaýynda. Aldaǵy ýaqytta osyndaı zańbuzýshylyqtarǵa jol bermeý maqsatynda memlekettik kirister organdarymen salyq tóleýshiler arasynda túsindirý jumystary júrgizildi,-delingen habarlamada.
Osyǵan deıin Abaı oblysynda prokýratýranyń yqpalymen 12 mlrd teńgelik jobanyń máselesi sheshilgeni týraly jazdyq.
