SQO-da 140 jasóspirim el chempıondarymen jattyǵý jasady
SQO Polıtsııa departamentiniń baspasóz qyzmetinen málim etkendeı, Petropavl qalasy oqý oryndarynyń 140 jasóspirimi oblys pen el namysyn halyqaralyq jarystarda qorǵap júrgen úsh chempıonmen jattyqty. Olar: jazǵy Azııa oıyndarynyń chempıony, jeńil atletıka boıynsha eki ret Olımpıadaǵa qatysqan Margarıta Muqasheva, Almatyda ótken Qysqy Azıadanyń sporttyq baǵdarlaýdan chempıony Aslan Toqbaev jáne taı boksynan Qazaqstannyń chempıony, Álem chempıonatynyń kúmis júldegeri Ivan Vaı-Hon-Týn. Sport juldyzdary balalarǵa jetken jetistikteri, jeńis jolynda kezdesken qıyndyqtar men alǵa qoıǵan maqsatqa jetýdegi paıdaly keńesterimen bólisti.
«Maǵan alǵashqy jarystardaǵy jeńisim úshin sport jýrnalısi Nesip Júnisbaevtiń «Olımpııskıı pýt» atty kitabyn syıǵa tartty. Úsh tomdyq shyǵarma maǵan bolashaqqa jol kórsetti. Qaıtsem de Olımpıadaǵa qatysamyn degen armanymdy oıatty. Men sportqa ne úshin kelgenimdi túsindim», - deıdi Margarıta Muqasheva.
Sportshylar jasóspirimderge birqatar jattyǵýlardy kórsetti. Sondaı-aq balalar ózin-ózi qorǵaýdyń negizgi tásilderin úırendi.
«Bıylǵy jyl elimizde Jastar jyly bolyp bekitildi. Oblystyq Polıtsııa departamentinde sondaı-aq, esirtkige qarsy kúres jyly. Chempıondarmen jattyǵý jasaý arqyly jastar boıynda esirtkige qarsy ımmýnıtet qalyptasady dep oılaımyn. Kórnekti is-shara 26 maýsym kúni atap ótiletin Halyqaralyq esirtkige qarsy kúres kúni qarsańynda uıymdastyryldy», - SQO PD basshysy Marat Tólebaev.
Aktsııa sońynda chempıondarǵa departamenttiń alǵys hattary tabys etildi, al belsendi balalarǵa «Sport esirtkige qarsy!» degen jazýy bar fýtbolkalar syıǵa berildi.
