SQO-da qurylys kezinde 380 mln teńge bıýdjet qarajatyn jymqyrý deregi anyqtaldy
ASTANA. KAZINFORM — Qarjylyq monıtorıng agenttigi Soltústik Qazaqstan oblysy boıynsha departamenti Aıyrtaý aýdanyndaǵy qurylys kezinde bıýdjet qarajatyn jymqyrý deregi boıynsha tergep-tekserý júrgizip jatyr.
Vedomstvonyń málimetinshe, 2017 jyly Energetıka jáne turǵyn úı-kommýnaldyq sharýashylyq basqarmasy «Bıznestiń jol kartasy — 2020» baǵdarlamasyn iske asyrý aıasynda «Akcent KZ» JShS-men «Syrymbet» ken ornyna deıin ishki alańdaǵy jol tarmaqtary men ınjenerlik jelileri bar temirjol kirme jolyn salý jóninde shart jasasqan.
— «Syrymbet» ken ornynyń óńir úshin strategııalyq mańyzy bar. Ol — Qazaqstandaǵy jalǵyz ári Ortalyq Azııadaǵy eń iri qalaıy ken orny. Memlekettik satyp alýdyń jalpy quny 1,4 mlrd teńge boldy. Bastapqyda qurylys 2018 jyly aıaqtalady dep josparlanǵan, alaıda jobany iske asyrý merzimi birneshe ret uzartylǵan, — delingen habarlamada.
Soǵan qaramastan, nysan qurylysy áli kúnge deıin aıaqtalmaǵan.
Saldarynan is júzinde oryndalmaǵan jumystardyń quny 380 mln teńge boldy.
Іs boıynsha merdiger uıymnyń basshysy jáne Energetıka jáne turǵyn úı-kommýnaldyq sharýashylyq basqarmasynyń burynǵy basshysy kúdikti dep tanyldy.
Sot sanktsııasymen 3 páter men avtoturaq ornyna tyıym salyndy.
Tergep-tekserý jalǵasyp jatyr. Ózge aqparat QR QPK-niń 201-babyna sáıkes jarııa etilmeıdi.
Eske salaıyq, buǵan deıin 8 myńnan astam adamdy aldaǵan Amanat Drive qarjy pıramıdasynyń basshylary sottalǵanyn jazǵanbyz.
